لاہور: بچوں اور بڑوں کے پسندیدہ ڈرامے عینک والا جن کے مشہور کردار زکوٹا جن نے حکومت سے مالی مدد کی اپیل کردی۔
تفصیلات کے مطابق 90 کی دہائی میں سرکاری ٹیلی ویژن پر نشر ہونے والے بچوں اور بڑوں کے پسندیدہ ڈرامے ’’عینک والا جن‘‘ کے مشہور و معروف کردار زکوٹا جن کو علالت کے باعث شدید مالی مشکلات کا سامنا ہے۔
لاہور میں میڈیا سے گفتگو کرتے ہوئے مطلوب الرحمان المعروف زکوٹا جن نے کہا کہ ’’میری مالی حالت بہت خراب ہے جس کی وجہ سے اپنی بیماری کا علاج نہیں کرواسکتا۔
پڑھیں: کیا آپ کو ’عینک والا جن‘ کے عمران اور معطر یاد ہیں؟
انہوں نے کہا کہ پنجاب حکومت کی جانب سے علاج کے لیے کچھ رقم دی گئی تھی تاہم اس بات کو کافی عرصہ گزر چکا ہے، مجھے مزید مالی مدد کی ضرورت ہے کیونکہ دن بہ دن میری صحت خراب سے خراب تر ہوتی جارہی ہے اور میرے پاس علاج کروانے کے پیسے نہیں ہیں۔
زکوٹا جن نے کہا کہ میں اپنے خاندان کا واحد کفیل ہوں اس لیے سخت بیماری کے باوجود بھی کام کرنے کے لیے مجبور ہوں، شدید علالت کے باوجود روزانہ ایک ڈرامہ کرنے کے لیے الحمرا ہال جاکر اداکاری کرتا ہوں تاکہ اہل خانہ کا گزر بسر چل سکے، مسلسل کام کرنے کی وجہ سے صحت مزید خراب ہوتی جارہی ہے۔
مزید پڑھیں: بل بتوڑی حکومتی امداد کی منتظر
اُن کا مزید کہنا تھا کہ میرے دونوں بیٹے بھی روزانہ میرے ساتھ ڈرامہ کرنے کے لیے الحمرا ہال جاتے ہیں کیونکہ اگر ہم یہ نہیں کریں گے تو گھر کا گزر بسر مشکل ہوجائے گا، کام کرنے کے عوض ہم معاوضہ کم دیا جاتا ہے اس لیے مہینے کے آخر میں ہمارے پاس کچھ نہیں بچتا۔
زکوٹا جن نے حکومت سے اپیل کی کہ فالج کا اٹیک ہونے کے بعد سے سیدھا بازو ٹھیک طریقے سے کام نہیں کررہا اُس کے باوجود میں کرنے پر مجبور ہوں، حکومت میری مالی معاونت کرے تاکہ اپنا علاج کرواسکوں۔
ڈرامے کی ویڈیو دیکھیں
یاد رہے ’’عینک والا جن‘‘ سے شہرت کی بلندیوں کو چھونے والی اداکارہ نصرت آرا (بل بتوڑی) بھی اس سے قبل سخت مالی مشکلات کے بعد حکومت سے مالی مدد کی اپیل کرچکی ہیں۔
