آج کے مارننگ شو میں تھیں ہماری مہمان آٹھ سالہ ہادیہ ہاشمی جن کے فن گلوکاری کا آج کل سارا جہان مداح ہے۔
اے آروائی نیوز کے مارننگ شو ’ باخبر سویرا ‘ میں شو کی میزبان مدیحہ نقوی نے با صلاحیت کمسن کلاسیکل گلوکارہ ہادیہ ہاشمی کے ساتھ ایک سیگمنٹ کیا جس میں ہادیہ نے دلچسپ انکشافات کیے۔
مدیحہ سے گفتگو کرتے ہوئے ہادیہ ہاشمی نے بتایا کہ ان کے اسکول میں نعت خوانی کا مقابلہ تھا جس میں ان کی پہلی پوزیشن آئی تھی ۔ اس وقت انہیں احساس ہوا تھا کہ وہ اس میدان میں کچھ کرسکتی ہیں ، اس وقت ان کی عمر چھ سال تھی۔
ہادیہ نے کہا کہ انہوں نے اپنے والد سے کہا کہ وہ سیکھنا چاہتی ہیں جس پر ان کے والد نے نہ صرف اجازت دی بلکہ ان کے لیے ایک استاد بھی ڈھونڈا ، یوں وہ موسیقی کے استاد ضیا کی اس اکیڈمی میں پہنچیں جہاں سے انہیں نیس کیفے بیسمنٹ کے لیے منتخب کیا گیا۔
ہادیہ کےمطابق ملکہ ترنم نور جہاں اور اس دور کی زندہ صوفی عابدہ پروین ان کی پسندیدہ گلوکارہ ہیں اور انہی دونوں گلوکاراؤں سے انہیں گانے کی تحریک ملتی ہے۔
مارننگ شو ہوسٹ کی فرمائش پر انہوں نے نورجہاں کا گانا ’جدو ہولی جی لیوے میرا نام‘ سنایا اور عابدہ پروین کا کلام ’گھوم چڑکھڑا‘ بھی سنایا۔
ہادیہ ہاشمی نے نیس کیفے بیسمنٹ کے سیزن پانچ میں پہلی بار سچ -دی بینڈ کے ساتھ ’بول ہوُ‘ گانے پر پرفارم کیا تھا ، ان کا یہ گانا انٹرنیٹ پر بہت زیادہ وائرل ہوا جس سے ان کی شہرت پورے ملک میں ہوگئی تھی۔
