واشنگٹن :سیکیورٹی اداروں نے رپورٹ میں بتایا ہے کہ پولیس ریسکیو کتوں کے ذریعے ممکنہ طور پر ملبے تلے دبے دیگر افراد کی تلاش جاری رکھے ہوئے ہے۔
تفصیلات کے مطابق امریکی ریاست کیلیفورنیا کے ایک مشہور ساحلی سیاحتی مقام پر تیس فٹ لمبا ایک پہاڑی چٹانی ٹکڑا گرنے سے کم از کم تین افراد ہلاک ہو گئے، ہلاک شدگان میں ایک خاتون بھی شامل ہے۔
امریکی خبر رساں ادارے کا کہنا تھا کہ یہ چٹان سان ڈیئگو کے ساحلی شہر کے شمال میں واقع گرینڈ ویو بیچ کے مقام پر گری۔ پولیس ریسکیو کتوں کے ذریعے ممکنہ طور پر ملبے تلے دبے دیگر افراد کی تلاش جاری رکھے ہوئے ہے،اس چٹانی ٹکڑے کے ٹنون وزنی ملبے تلے بہت سی کرسیاں اور سرفنگ بورڈز دب گئے ہیں۔
حکام کے مطابق متعلقہ چٹان کا باقی حصہ گرنے کا خطرہ بھی ہے اور اسی لیے امدادی کارکن انتہائی احتیاط سے کام لے رہے ہیں۔
مقامی خبر رساں ادارے کا کہنا تھاکہ افسوس ناک حادثے میں زخمی ہونے والے متاثرین کی تفصیلات معلوم نہیں ہوسکی ہیں البتہ حادثے میں کسی بچے کے زخمی یا ہلاک ہونے کی کوئی اطلاع موصول نہیں ہوئی ہے۔
غیر ملکی خبر رساں ادارے کا کہنا تھا کہ سنہ 2016 اور 2008 میں بھی مذکورہ سیاحتی مقام پر مٹی کا تودہ گرنے سے دو افراد ہلاک ہوگئےتھے۔
