ممبئی : پاکستان میں پرفارمنس پر بھارتی گلوکار میکا سنگھ پر بالی وڈ میں کام کرنے پر پابندی لگا دی گئی ، میکا سنگھ نے گزشتہ ہفتے پاکستان کے شہر کراچی میں شادی کی ایک تقریب کے دوران لائیوپرفارمنس کی تھی ۔
تفصیلات کے مطابق بھارتی فلم اندسٹری بھی نفرت کی آگ میں اپنے ہی لوگوں کو جلانے لگی، پاکستان میں پرفارم کرنا میکا سنگھ کو مہنگا پڑگیا اور بالی وڈ میں کام کرنے پر بین لگا دیا گیا۔
ہندوستان ٹائمز کے مطابق ’’آل انڈیا سائنے ورکرز ایسوسی ایشن‘‘ نے میکا سنگھ پر پاکستان میں پروگرام میں پرفارم کرنے پر کسی بھی قسم کے اشتہار، فلم یا ٹی وی پروگرام میں کام کرنے پر پابندی لگا دی۔
نامور بھارتی گلوکار میکا سنگھ نے گزشتہ ہفتے پاکستان کے شہر کراچی میں شادی کی ایک تقریب کے دوران لائیوپرفارمنس کی تھی اور اسی وقت بھارتی حکومت کی جانب سے مقبوضہ کشمیر کی خصوصی حیثیت ختم کرنے کے باعث دونوں ممالک میں کشیدگی عروج پر پہنچ چکی تھی۔
میکا سنگھ کی پرفارمنس کی ویڈیو منظرعام پر آنے کے بعد انڈین سینے ورکرز ایسوسی ایشن (اے آئی سی ڈبلیو اے) نے میکاسنگھ پر پابندی عائد کرتے ہوئے ان کا بائیکاٹ کرنے کا اعلان کردیا۔
ایسوسی ایشن کی جانب سے جاری کے گئے بیان کے مطابق انہوں نے میکاسنگھ کے ساتھ فلم پروڈکشن ہاؤسز، میوزک کمپنیز اور آن لائن میوزک وغیرہ کا بائیکاٹ کرنے کا فیصلہ کیا ہے۔
سینے ایسوسی ایشن کے صدر سریش گپتا کا کہنا ہے کہ ہم اس بات کو یقینی بنائیں گے کہ بھارت میں کوئی بھی میکا سنگھ کے ساتھ کام نہ کرے اور اگر کسی نے ایسا کیا تو اسے قانونی مسائل کا سامنا ہوسکتاہے۔
جاری بیان میں مزید کہاگیا ہے کہ جب پاکستان اور بھارت کے درمیان کشمیر کے معاملے پرٹینشن چل رہی تھی اس وقت میکا سنگھ نے قوم کے بجائے پیسوں کو اہمیت دی۔
بھارتی میڈیا کے مطابق میکا سنگھ کو پاکستان میں شادی میں پرفارمنس کے لیے تقریباً ایک کروڑ روپے دئیے گئے تھے۔
