اسلام آباد: وزیر اعظم عمران خان نے یوم سیاہ کشمیر کے موقع پر اسلام آباد میں ’کشمیر فریڈم ٹری‘ کے نام سے ایک پودا لگا دیا۔
تفصیلات کے مطابق آج پاکستان سمیت دنیا بھر میں کشمیری یوم سیاہ منا رہے ہیں، اس موقع پر کشمیری بہن بھائیوں کے ساتھ اظہار یک جہتی کے لیے وزیر اعظم عمران خان نے اسلام آباد میں کشمیر کی آزادی کے نام پر خصوصی پودا لگایا۔
پودے کو ’آزادیٔ کشمیر کا پیڑ‘ کا نام دیا گیا ہے، وزیر اعظم نے اپنے ہاتھوں سے پودا لگایا، پھر اسے پانی بھی دیا، بعد ازاں خصوصی دعا بھی کی۔
بتایا گیا کہ کشمیر فریڈم ٹری کا مقصد کشمیری بہن بھائیوں کو یہ پیغام دینا ہے کہ کشمیر کی آزادی قریب ہے، پاکستان ان کے دکھ درد میں شریک ہے، اور ان کی آزادی کے لیے ہمیشہ ان کے ساتھ کھڑا رہے گا۔
واضح رہے کہ آج جموں و کشمیر پر بھارت کے غاصبانہ قبضے کو 72 سال مکمل ہو گئے ہیں، پاکستان سمیت دنیا بھر میں کشمیری یوم سیاہ منا رہے ہیں۔
تازہ ترین: پاکستان ہر فورم پر کشمیریوں کا ساتھ دے گا: وزیر اعظم عمران خان
اس موقع پر وزیر اعظم عمران خان نے قوم اور کشمیریوں کے لیے خصوصی ویڈیو پیغام دیتے ہوئے کہا ہے کہ آج وہ سیاہ دن ہے جب بھارتی افواج کشمیر میں اتریں، اقوام متحدہ نے فیصلہ کیا تھا کہ کشمیر کے لوگوں کو فیصلے کا حق دیا جائے، لیکن کشمیریوں کے ساتھ دھوکا کیا گیا۔
وزیر اعظم نے کہا کچھ لوگ کہتے ہیں کہ کشمیریوں کے لیے ہمیں ہتھیار اٹھا لینے چاہئیں، ہتھیار اٹھانے کی بات کرنے والے کشمیریوں سے دشمنی کر رہے ہیں، ہم نے کشمیریوں کی اخلاقی، سفارتی اور سیاسی حمایت اور مدد کرنی ہے، مودی کسی بھی واقعے کو پاکستان کے خلاف استعمال کرنا چاہتا ہے، مودی عالمی سطح پر کسی بھی واقعے کی بنیاد پر پروپیگنڈا کرے گا۔
