سڈنی: آسٹریلیا کے شمالی علاقے کاکاڈو میں خونخوار مگرمچھوں کی آماج گاہ کہلانے والے دریا میں اچانک گاڑی پھنس گئی جس میں ایک ہی خاندان کے 4 افراد سوار تھے۔
غیرملکی خبررساں ادارے کی رپورٹ کے مطابق کاکاڈو نیشنل پارک میں فیملی اپنی گاڑی دریا سے پار کرنا چاہ رہی تھی لیکن ناکام ہوگئی، کار پانی میں پھنستے ہی اطراف میں مگر مچھ آگئے۔ گاڑی میں میاں بیوی اور ان کی بیٹی موجود تھی۔ خوش قسمتی سے تمام افراد محفوظ رہے۔
رپورٹ کے مطابق گاڑی کو پانی سے نکالنے کے لیے شوہر نے بڑی کوششیں کیں اس دوران وہ پھسل کر مگر مچھ کے سامنے بھی گرے لیکن ان پر حملہ نہیں ہوا بعد ازاں وہاں موجود دیگر سیاحوں نے متاثرہ خاندان کو پانی سے باہر نکالنے میں مدد کی۔ اس سے قبل مذکورہ دریا میں دوسری گاڑی بھی پھنسی تھی جسے نکال لیا گیا تھا۔
واقعے کے بعد بیوی نے مقامی میڈیا سے گفتگو کرتے ہوئے بتایا کہ میری زندگی کے یہ سب سے خطرناک لمحات تھے، کسی بھی وقت مگر مچھ حملہ کرسکتے تھے۔
خیال رہے کہ اس سے قبل کاکاڈو کے اس دریا میں چند لوگوں کی اموات بھی ہوچکی ہیں۔
