امریکا میں ایک شخص نے چھریوں اور سیبوں کے ساتھ عجیب کرتب دکھاتے ہوئے گنیز ورلڈ ریکارڈ توڑ دیا، مذکورہ شخص اس سے قبل 150 ورلڈ ریکارڈز توڑ چکا ہے۔
امریکی ریاست اڈاہو کا رہائشی یہ شخص ڈیوڈ رش اس بار ایک نئے کرتب کے ساتھ سامنے آیا ہے۔ ڈیوڈ نے صرف 30 سیکنڈز میں ہوا میں 3 چاقو گھماتے ہوئے ہوا میں اچھالے گئے متعدد سیب کاٹ دیے جن کی تعداد بعد ازاں 21 نکلی۔
اس کرتب کے لیے ڈیوڈ 3 چاقو ہوا میں گھماتا رہا، اور اس دوران اس کی جانب 21 سیب پھینکے گئے جنہیں اس نے ہوا میں ہی دو ٹکڑے کردیے۔ اس پورے عمل میں اسے صرف 30 سیکنڈز کا وقت لگا۔
ڈیوڈ کا کہنا ہے کہ اس کرتب کے لیے اسے مہینوں تک پریکٹس کرنی پڑی۔
اپنے اس کرتب کے ساتھ ڈیوڈ نے سابقہ ورلڈ ریکارڈ توڑ دیا جو ایک جگلر کی جانب سے بنایا گیا تھا جس میں اس نے 17 سیب کاٹے تھے۔
ڈیوڈ اس سے قبل بھی 150 کے قریب گنیز ورلڈ ریکارڈز توڑ چکا ہے، اس کا کہنا ہے کہ اس کا حالیہ ریکارڈ سائنسی تعلیم کے فروغ کے لیے تھا۔
