پشاور : باچا خان ایئر پورٹ پر دہشت گردی کے واقعے کے بعد پروازیں معطل کرنے والی غیر ملکی ایئرلائنز نے اپنی سروس بحال کردی ہے۔ایئر پورٹ ذرائع کے مطابق دبئی سے کل صبح سات بجے ایمریٹس ایئر لائن کی پرواز آئے گی جبکہ اتحاد ایئر لائن یکم اگست سے فضائی سروس بحال کردے گی۔
دیگر غیر ملکی ایئر لائنز بھی اپنی معطل پروازیں بحال کرنے کے فیصلے پر غور کررہی ہیں۔ واضح رہے کہ پشاور ایئر پورٹ پر گزشتہ مہینے ہونے والے دہشت گرد حملے کے دوران طیارے میں گولیاں لگنے کے باعث ایک خاتون کی ہلاکت اور عملے کے دو اراکین کے زخمی ہونے کے بعد غیر ملکی پروازوں نے پشاور کے لیے پروازیں معطل کا فیصلہ کیا تھا۔
ایمریٹس ایئرلائن کی جانب سے جاری کردہ ایک بیان میں کہا گیا تھا کہ ایمریٹس پچیس جون دوہزار چودہ سے پشاور کے لیے اور پشاور سے پروازوں کو سلامتی کے یقینی نہ ہونے کے خدشے کے پیش نظر معطل کردیا ہے۔
