لاہور: پولیس نے اوورسیز پاکستانی سے بھتہ مانگنے اور پلاٹ پر قبضے کی کوشش کرنے پر بد نام زمانہ قبضہ مافیا منشا بم اور اس کے بیٹوں پر مقدمہ درج کر لیا ہے۔
تفصیلات کے مطابق لاہور میں پولیس نے بروقت کارروائی کرتے ہوئے بدنامہ زمانہ قبضہ گروپ منشا بم اور اسکے بیٹوں کی جانب سے اوورسیز پاکستانی کی زمین پر قبضہ کرنے کی کوشش ناکام بنادی اور انکے خلاف مقدمہ درج کر لیا ہے جبکہ ملزمان موقع سے فرار ہوگئے ہیں۔
پولیس کے مطابق منشا بم اور اس کے بیٹوں طارق منشا اور فیصل منشا نے بیرون ملک مقیم جمیل نامی شہری سے بیس لاکھ روپے بھتہ طلب کیا، بھتہ نہ دینے پر جمیل نامی شہری کے پلاٹ پر قبضہ کی کوشش کی اور پلاٹ کی دیواریں مسمار کردی۔
یہ بھی پڑھیں: منشا بم کو ہر دورِ حکومت میں سیاسی پشت پناہی حاصل رہی: پولیس
یہی نہیں بااثر ملزمان پلاٹ پر بنے کمرے سے قیمتی سامان بھی چوری کرکے لے گئے، اوورسیز پاکستانی شہری نے کھلی کچہری میں قبضہ گروپ کی نشاندہی کرتے ہوئے دادرسی کی اپیل کی تھی، جس پر سی سی پی او لاہور نے ایکشن لیا اور پولیس حکام کو ہدایت کی کہ منشاء بم اور اس کے بیٹوں کے خلاف فوری مقدمہ کا اندراج کیا جائے۔
واضح رہے کہ منشا بم کے دونوں بیٹے طارق منشا اور فیصل منشا اس سے قبل بھی پولیس کے ہاتھوں گرفتار ہوچکے ہیں، ملزمان پر سرکاری زمینوں پر قبضہ کرنے کا الزام تھا۔
