کراچی: وزیر خارجہ شاہ محمود قریشی نے سندھ حکومت کے خلاف تحریک انصاف کی گھوٹکی سے کراچی مارچ میں شرکت کا فیصلہ کر لیا ہے۔
اے آر وائی نیوز کے مطابق پی ٹی آئی سندھ کے صدر اور وفاقی وزیر علی زیدی نے پی ٹی آئی کے وائس چیئرمین اور وزیر خارجہ شاہ محمود قریشی سے ملاقات کی، جس میں گھوٹکی سے کراچی مارچ پر تفصیلی گفتگو ہوئی، ملاقات میں سندھ کی سیاسی صورت حال بالخصوص سندھ لانگ مارچ پر تبادلہ خیال کیا گیا۔
وزیر خارجہ شاہ محمود قریشی کی جانب سے گھوٹکی سے کراچی مارچ میں شرکت کا فیصلہ بھی سامنے آیا، انھوں نے عزم ظاہر کیا ہے کہ عوام کے حقوق کے لیے ہر صورت گھوٹکی سے کراچی مارچ کریں گے۔
شاہ محمود کا کہنا تھا کہ عوامی طاقت سے سندھ پر قابض مافیا سے چھٹکارا حاصل کرنے کا وقت آگیا ہے، سندھ کا ہر شہری ایک با اختیار بلدیاتی نظام کی بحالی چاہتا ہے۔
وفاقی وزیر علی زیدی کا مارچ کے حوالے سے کہنا تھا کہ گھوٹکی سے کراچی مارچ زرداری مافیا کی نیندیں اڑا دے گا، سندھ حکومت نے صوبے کے عوام کا ہمیشہ استحصال کیا ہے، اب اختیارات کی نچلی سطح تک منتقلی ہمارا اولین ایجنڈا ہے۔
علی زیدی کا کہنا تھا کہ سپریم کورٹ کے فیصلے سے زرداری مافیا کی بدنیتی سے پردہ اٹھ گیا ہے۔
