لاہور: مسلم لیگ ن کے رہنما اوروفاقی وزیرریلوے خواجہ سعد رفیق نے کہا ہے کہ عمران خان نوازشریف فوبیا کا شکار ہوگئے ہیں، اپنے ساتھ کھڑے لوگوں انہیں فرشتے اورباقی سب چور نظر آتے ہیں۔
وہ لاہورمیں پریس کانفرنس سے خطاب کررہے تھے۔ خواجہ سعد رفیق نے کہا کہ الیکشن میں بدنظمی ہوئی، جس کے ذمہ دار عمران خان ہیں، ان ہی کے مطالبے پرجوڈیشل افسران کو آراوز مقررکیا گیا تھا۔
لاہورریلوے ہیڈکوارٹرزمیں پریس کانفرنس سے خطاب کرتے ہوئے وفاقی وزیرخواجہ سعد رفیق کا کہنا تھا کہ ان کے خلاف گھر میں ٹھپے لگانے کا الزام غلط ہے، تحریک انصاف کارکنوں کو تشدد پراکسا رہی ہے، جس سے معاملات مزید خراب ہوں گے۔
انہوں نے کہا کہ عمران خان سیاسی نابالغ ہیں، وہ جس زبان میں بات کرتے ہیں، اس لہجے میں جواب نہیں دیں گے۔ خواجہ سعد رفیق نے کہا کہ پیپلزپارٹی نے 18 اکتوبر کے جلسے کیلئے اسپیشل ٹرینیں چلانے کا مطالبہ کیا ہے۔
وہ عمران خان اورطاہرالقادری سمیت تمام سیاسی جماعتوں کے جلسوں کیلئے اسپیشل ٹرینیں چلانے کیلئے تیار ہیں لیکن دھرنوں کیلئے نہیں۔ انہوں نے کہا کہ گو نوازگو کے نعرے لگانے والے یاد رکھیں، ایسے نعرے ان کے خلاف بھی لگ سکتے ہیں۔
وزیر ریلوے نے کہا کہ دھرنوں سے غیرملکی سرمایہ کاری رک گئی ہے اور معیشت کو نقصان پہنچا ہے۔
