اسلام آباد : ترجمان دفتر خارجہ کا کہنا ہے کہ پاکستان کی بھارت سے متعلق پالیسی واضح ہے، بھارت ایسا ماحول پیدا کرے جس سے واضح ہو دہشت گردی میں ملوث نہیں۔
تفصیلات کے مطانق وزیر اعظم شہباز شریف کے بھارت سے متعلق بیان پر دفتر خارجہ نے وضاحت کرتے ہوئے کہا کہ پاکستان کی بھارت سے متعلق پالیسی واضح ہے، پاکستان بھارت کے کشمیر میں مظالم کی ہر سطح پر مذمت کرتا ہے۔
ترجمان دفتر خارجہ کا کہنا تھا کہ پاکستان بھارت سمیت پڑوسی ممالک کیساتھ بہتر تعلقات چاہتا ہے، بھارت ایسا ماحول پیدا کرے جس سے واضح ہو دہشت گردی میں ملوث نہیں۔
یاد رہے ترجمان وزیراعظم آفس کی جانب سے وزیراعظم شہبازشریف کے العربیہ چینل کو انٹرویو پر وضاحت دی تھی۔
ترجمان کا کہنا تھا کہ وزیراعظم نے مسلسل کہا ہے کہ پاکستان اور بھارت کو دو طرفہ مسائل بات چیت سے حل کرنا چاہیے تاہم 5 اگست کے غیر آئینی اقدامات کی واپسی پر ہی بات ہوسکتی ہے۔
وزیراعظم آفس نے وضاحت میں کہا تھا کہ یکطرفہ اقدامات منسوخ کئے بغیر مذاکرات ممکن نہیں، مسئلہ کشمیر کا حل یواین قراردادوں اور کشمیریوں کی امنگوں کے مطابق ہونا چاہیے۔
ترجمان کا مزید کہنا تھا کہ وزیراعظم نے دورہ یواےای کے دوران انٹرویو میں مؤقف بالکل واضح کیا۔
