بنگلورو : بھارت میں ہندوؤں کی نچلی ذات دلت افراد سے انتہائی ذلت آمیز سلوک کیا جاتا ہے جس کی مثال آئے روز میڈیا میں نظر آنے والی خبریں ہیں۔
اس حوالے سے سوشل میڈیا پر ایک ویڈیو گردش کررہی ہے جس میں ایک دلت خاتون پر غیرانسانی ظلم کے واقعے کو ریکارڈ کیا گیا ہے۔
ویڈیو میں دیکھا جاسکتا ہے کہ ایک اونچی ذات کا ہندو ایک دلت عورت پر اس لیے تشدد کررہا ہے کہ اس کی گائے گھومتی پھرتی کھیت میں آگئی تھی وہ شخص شدید غصے کے عالم میں اس بے بس خاتون کو ایک درخت سے باندھ کر اس پر بے دردی سے جوتے برسا رہا ہے۔
خاتون کے ساتھ مار پیٹ کی ویڈیو سوشل میڈیا پر شیئر کی گئی ہے جس کے بعد اونچی ذات کے شخص امریش کمبر کے خلاف مقدمہ درج کرلیا گیا ہے۔
Trigger Warning ⚠️ Sensitive Content pic.twitter.com/pkeHudPCXE
— The Dalit Voice (@ambedkariteIND) February 9, 2023
ویڈیو میں دیکھا جاسکتا ہے کہ شوبھما ہریجن نامی یہ خاتون ملزم سے التجا کرتی ہے کہ وہ اسے چپل سے مارنا بند کرے لیکن وہ تشدد جاری رکھتا ہے۔
تھانے میں درج کی گئی رپورٹ میں کہا گیا ہے کہ جب خاتون کی گائے کھیت میں داخل ہوئی تو اس نے فوری طور پر اسے وہاں سے نکالا اور اسے گھر لے جانے لگی لیکن ملزم نے اسے روک لیا اور کھمبے سے باندھ دیا۔
