کراچی: پولیس نے دارالسلام سوسائٹی سے اغواء ہونے والے کارشوروم مالک کو بازیاب کراتے ہوئے ملیر سکھن پولیس کے اہلکار کو ساتھی اغواء کاروں سمیت گرفتار کرلیا۔
تفصیلات کے مطابق کراچی کے علاقے کورنگی انڈسٹریل ایریا پولیس نے کورنگی بند کے قریب اہم کارروائی کرتے ہوئے دارالسلام سوسائٹی سے اغواء ہونے والے کار شوروم کے مالک شہبازکو بازیاب کروالیا۔
ایس ایس پی کورنگی ساجد امیر سدوزئینے بتایا کہ کارروائی کے دوران ملیر سکھن پولیس کے اہلکار سمیت 3 اغواء کاروں کو گرفتارکرتے ہوئے اسلحہ اور گاڑیاں برآمد کرلی گئی ہے۔
گرفتار ملزم سہیل حسن ملیر سکھن تھانے کا پولیس کانسٹیبل جبکہ بلال کار پی کیو آرکا اہلکار ہے اور تیسرا اغواء کارشہزاد پرائیویٹ شخص ہے۔
ساجد سدوزئی کا کہنا تھا کہ ملزمان نے شوروم مالک شہباز کو گذشتہ روز اغواء کیا تھا اور رہائی کے بدلے 20 لاکھ مانگے جبکہ 3 لاکھ روپے میں ڈیل فائنل ہوئی۔
ملزمان اغواء کے بعد مغوی شہباز کو ملیر کے مختلف علاقوں میں گھماتے رہے اور کرنٹ لگاکر تشدد بھی کرتے رہے۔
مغوی شہبازنے بتایا کہ ملزمان نے اس کے اے ٹی ایم کارڈ سے بھی رقم نکالی۔
ایس ایس پی کورنگی کے مطابق تاوان وصولی کے لیے ملزمان نے تین مقامات تبدیل کیے لیکن پولیس نے حکمت عملی بناتے ہوئے تین ملزمان کو گرفتار کرلیا۔
پوری چھاپہ مار کارروائی کے دوران مغوی کی امریکن نیشنل بیوی ساتھ رہی اور امریکن نیشنل خاتون کی جانب سے پولیس کی کامیابی کو سراہا گیا۔
کورنگی پولیس کا گرفتار ملزمان سے مزید تفتیش کا عمل جاری ہے۔
