اسلام آباد توشہ خانہ کیس میں ہائیکورٹ نے عمران خان کی وارنٹ گرفتاری منسوخی کی درخواست پر حکم نامہ جاری کردیا۔
اے آر وائی نیوز کے مطابق اسلام آباد ہائیکورٹ میں عمران خان کے وارنٹ گرفتاری برقرار رکھتے ہوئے انہیں سیشن عدالت سے رجوع کرنے کا حکم دیا گیا ہے۔
ہائیکورٹ کا کہنا ہے کہ عمران خان ن ےجو انڈر ٹیکنگ دی وہ متعلقہ عدالت میں جاکر دیں۔
عدالتی حکم نامے میں کہا گیا ہے کہ متعلقہ عدالت وارنٹ گرفتاری اور انڈر ٹیکنگ پر فیصلہ کرے گی لہٰذا عمران خان اپنی درخواست سیشن عدالت میں دائر کریں۔
خیال رہے کہ عمران خان کی لیگل ٹیم نےگزشتہ روز اسلام آباد ہائی کورٹ میں توشہ خانہ کیس میں ناقابل ضمانت وارنٹ گرفتاری کے خلاف درخواست دائر کی تھی جس میں وارنٹ منسوخ کرنے اور فوری سماعت کی استدعا کی گئی تھی تاہم رجسٹرار آفس نے عمران خان کی درخواست پر اعتراض عائد کیاکہ عمران خان کا بائیومیٹرک نہیں کرایا گیا۔
ہائی کورٹ نے عمران خان کے وارنٹ گرفتاری منسوخی کی درخواست پرکل (منگل) کو سماعت کی استدعا مسترد کردی تھی اور درخواست آج بروز بدھ سماعت کے لیے مقرر کی۔
