کراچی : سندھ ہائیکورٹ نے تجاوزات اور زمینوں پر غیرقانونی قبضہ ختم کرانے کیلئے حکم دیتے ہوئے چیف سیکریٹری سندھ اور ڈی جی کے ڈی اے کو تجاویز کے ساتھ طلب کرلیا۔
تفصیلات کے مطابق سندھ ہائی کورٹ میں قبضہ مافیا کے خلاف آپریشن کے ڈی اے کیلئے مشن امپوسیبل بن گیا، کے ڈی اے نے عدالت کے سامنے بے بسی ظاہر کرتے ہوئے کہا رینجرز اور پولیس کی مدد کے بغیر آپریشن نہیں کر سکتے۔
عدالت نے کہا کہ بتائیں قبضہ مافیا سے مقابلہ کرنے کیلئے کے ڈی اے کو کیسے بااختیار بنایا جائے ؟عموماً تجاوزات کے خلاف آپریشن کیلئے رینجرز اور پولیس کی معاونت نہیں ملتی، محدود اختیارات کی وجہ سے کے ڈی اے کو آپریشن میں مشکلات پیش آتی ہیں۔
عدالت کا کہنا تھا کہ عدالتی احکامات کی وجہ سے کچھ کارروائیوں میں قانون نافذ کرنے والے اداروں کی معاونت مل جاتی ہے ، کے ڈی اے جیسے محکموں کو آپریشن کیلئے مضبوط اور بااختیار ہونا چاہیے۔
عدالت نے حکم دیتے ہوئے کہا کہ چیف سیکریٹری اور ڈی جی کے ڈی اے خود پیش ہوکر تجاویز دیں۔
