اسلام آباد : آئندہ بجٹ میں 100 یا اس سے زائد ڈالر مالیت کے امپورٹڈ موبائل فونز پر ڈیوٹی بڑھائے جانے کا امکان ہے، جس سے موبائل فونز مزید مہنگے ہوجائیں گے۔
تفصیلات کے مطابق آئندہ بجٹ میں امپورٹڈ غیر ضروری اور لگژری آئٹمز پر ٹیکسز بڑھانے کی تجویز سامنے آگئی ، جس کے باعث امپورٹڈ موبائل مزید مہنگے ہونے کا امکان ہے۔
ذرائع کا کہنا تھا کہ آئندہ بجٹ میں 100 یا اس سے زائد ڈالر مالیت کے امپورٹڈ موبائل پر ڈیوٹی بڑھائے جانے کا امکان ہے جبکہ امپورٹڈ انرجی سیور بلب، فانوس اورایل ای ڈی بھی مہنگی ہونے کا امکان ہے۔
ذرائع نے بتایا کہ امپورٹڈ لگژری آئٹمز پر اضافی سیلز ٹیکس منی بجٹ کے بعد وفاقی بجٹ کا حصہ بنانے کا فیصلہ کیا گیا ہے ، ذرائع نے بتایا کہ بجٹ لگژری آئٹمز پر سیلز ٹیکس 25 فیصد برقرار رکھنے سے 45 سے 55 ارب کی آمدن متوقع ہے۔
ذرائع کے مطابق لگژری آئٹمز میں 500 ڈالر مالیت سے زائد کے امپورٹڈ موبائل فون شامل ہیں جبکہ خواتین کے لیے امپورٹڈ میک اپ کے سامان پر سیلز ٹیکس 25 فیصد پر برقرار رہے گا۔
اس کے علاوہ امپورٹڈ لپ اسٹک، مسکارے اور فیس پاؤڈر ، پالتو جانوروں کی امپورٹڈ خوراک ، امپورٹڈ برانڈڈ شوز ، امپورٹڈ شیمپو، صابن اور لوشن پر بھی سیلز ٹیکس 25 فیصد پر برقرار رہے گا۔
ذرائع کے مطابق امپورٹڈپرائیویٹ اسلحے، برانڈڈ ہیڈ فونز،آئی پوڈ اور اسپیکرز، امپورٹڈ لگژری برتنوں، امپورٹڈ باتھ فٹنگز، امپورٹڈ ٹائلز ، سینٹری کے سامان اور امپورٹڈ گاڑیوں پر سیلز ٹیکس کی شرح 25 فیصد پر برقرار رہے گی۔
اس کے علاوہ امپورٹڈ چاکلیٹ، امپورٹڈ ٹافیاں اور کینڈی ، امپورٹڈ جام، جیلی اورمایونیز پر سیلز ٹیکس کی شرح 25 فیصد پر برقرار رہے گی۔
