ریاض: سعودی عرب کے شاہ سلمان بن عبدالعزیز کی جانب سے 1 ہزار فلسطینیوں کے لیے فریضہ حج کی سہولت پیش کی گئی ہے، یہ افراد فلسطینی شہدا کے لواحقین، زخمی اور اسیران کے اہلخانہ ہیں۔
اردو نیوز کے مطابق سعودی عرب کے شاہ سلمان بن عبدالعزیز نے فلسطینی شہدا کے لواحقین، زخمیوں اور اسیران کے ایک ہزار اہلخانہ کو شاہی مہمان کے طور پر حج کروانے کے احکامات دیے ہیں۔
ہفتے کے روز ایک بیان میں کہا گیا ہے کہ یہ اقدام ضیوف خادم الحرمین الشریفین پروگرام کا حصہ ہے جس کی نگرانی ہر سال مملکت میں وزارت اسلامی امور کرتی ہے۔
ضیوف خادم الحرمین الشریفین پروگرام کے نگران اعلیٰ شیخ ڈاکٹر عبداللطیف بن عبدالعزیز آل الشیخ نے فسلطینی شہدا کے لواحقین کو شاہی مہمان کے طور پر حج کروانے کے احکامات پر شاہ سلمان بن عبد العزیز کا خصوصی شکریہ ادا کیا۔
واضح رہے کہ شاہ سلمان بن عبد العزیز کی میزبانی میں حج پروگرام ہر سال جاری کیا جاتا ہے جس میں دنیا بھر سے متعدد افراد شاہی مہمان کے طور پر فریضہ حج ادا کرتے ہیں۔
