اسلام آباد: حالیہ مون سون میں 25 جون سے اب تک ملک بھر میں 86 افراد جان کی بازی ہار چکے ہیں۔
تفصیلات کے مطابق حالیہ مون سون سے ہونے والے جانی و مالی نقصان سے متعلق رپورٹ جاری کر دی گئی، این ڈی ایم اے کا کہنا ہے کہ گزشتہ 24 گھنٹوں میں ملک بھر میں مزید 6 افراد کی اموات رپورٹ ہوئی ہیں۔
نیشنل ڈیزاسٹر مینجمنٹ اتھارٹی کی رپورٹ کے مطابق سندھ اور پنجاب میں 3، 3 افراد جان کی بازی ہار گئے، جب کہ گزشتہ 24 گھنٹوں میں ملک بھر میں 9 افراد زخمی بھی ہوئے ہیں۔
این ڈی ایم اے کے مطابق 25 جون سے اب تک ملک بھر میں 86 افراد جان کی بازی ہار چکے ہیں، جاں بحق افراد میں 33 مرد، 16 خواتین اور 37 بچے شامل ہیں، سب سے زیادہ پنجاب میں 52 اموات رپورٹ ہوئیں، خیبر پختون خوا سے 20، بلوچستان سے 6، سندھ سے 5 اور آزاد کشمیر سے 3 اموات رپورٹ ہوئیں۔
حالیہ بارشوں سے ملک بھر میں کل 151 افراد زخمی ہوئے، زخمیوں میں 56 مرد، 43 خواتین اور 52 بچے شامل ہیں، ملک بھر میں کل 97 گھروں کو نقصان پہنچا، بارشوں اور سیلاب سے 46 مویشیوں کو نقصان پہنچا۔ این ڈی ایم اے کا یہ بھی کہنا ہے کہ دریائے راوی میں جسر کے مقام پر درمیانے سے اونچے درجے کے سیلاب کا خدشہ ہے اور دریائے چناب میں درمیانے درجے کے سیلاب کا خدشہ ہے۔
