ریاض : سعودی وزارت حج و عمرہ نے دنیا بھر سے مملکت میں آنے والے عمرہ زائرین کی رہنمائی کیلئے اہم ہدایات جاری کی ہیں۔
سعودی ذرائع ابلاغ کی رپورٹ کے مطابق بیرون مملکت سے عمرہ زائرین کی آمد شروع ہوچکی ہے اس حوالے سے وزارت حج وعمرہ کی جانب سے عمرہ زائرین کی رہنمائی کے لیے اہم معلومات سے انہیں مطلع کرنے کا سلسلہ جاری ہے۔
اس حوالے سے اپنے ایک بیان میں سعودی وزارت حج و عمرہ نے کہا ہے کہ عمرہ زائرین ضرورت کی اہم اشیاء جن میں شناختی کارڈ اور ہنگامی ٹیلی فون شامل ہیں کو زائرین اپنے ہاتھ والے بیگ میں رکھیں۔
وزارت حج وعمرہ کا کہنا ہے کہ بیرون مملکت سے آنے والے عمرہ زائرین کو چاہئے کہ وہ اپنے ہمراہ بیگ میں پاسپورٹ، شناختی کارڈ (خلیجی ممالک کے زائرین کے لیے) ، عمرہ ایجنٹ کا نمبر رابطہ نمبر اور ایڈریس، عمرہ کے لیے مخصوص دعاؤں کی کتاب کے علاوہ ہنگامی حالت میں رابطہ کرنے کے لیے ٹیلی فون نمبرز اپنے ہمراہ رکھیں۔
وزارت حج وعمرہ کا مزید کہنا ہے کہ عمرہ کے لیے زائرین جب بھی اپنی رہائش گاہ سے نکلیں تو موسم کی صورتحال کو پیش نظر رکھتے ہوئے پانی کی بوتل اور چھتری ضرور اپنے ساتھ رکھیں۔
اس کے علاوہ مکہ مکرمہ اور مدینہ منورہ کے اہم مقامات کے نقشے کی سہولت بھی موجود ہے زائرین کوچاہئے کہ وہ دونوں شہروں کا نقشہ ساتھ رکھیں تاکہ کسی قسم کی دشواری کی صورت میں نقشے کی مدد سے اپنی رہائش یا دیگر مقامات تک پہنچ سکیں۔
دریں اثنا وزارت حج وعمرہ نے زائرین کو ہدایت کی ہے کہ کسی بھی غیرمعمولی صورتحال میں وزارت کے شکایات مرکز کے نمبر920002814 پررابطہ کیا جاسکتا ہے۔ مذکورہ نمبرمدینہ منورہ، مکہ مکرمہ اورجدہ کے لیے یکساں ہے۔
خیال رہے کہ وزارت حج وعمرہ کی جانب سے عمرہ سروسز فراہم کرنے والی کمپنیوں کو ہدایت کی گئی ہے کہ وہ اپنے زیر انتظام آنے والے عمرہ زائرین کا خیال رکھیں اورانہیں وہ تمام سہولتیں مہیا کریں جس کی انہوں نے یقین دہانی کرائی ہے۔
اگر عمرہ سروس کمپنی کی جانب سے زائرین کو مقررہ خدمات مہیا نہیں کی جاتیں یا سہولیات کی فراہمی میں کوتاہی ہوتی ہے تو اس صورت میں عمرہ زائر کا حق ہے کہ وہ اپنی شکایت وزارت حج وعمرہ کے شکایت سیل میں درج کرائے۔
واضح رہے کہ حج سیزن کے اختتام کے ساتھ ہی اس برس نئے سال ہجری کے پہلے دن سے بیرون ممالک سے عمرہ زائرین کی آمد کا سلسلہ شروع ہوچکا ہے، مختلف ممالک سے عمرہ زائرین کی آمد جاری ہے۔
