خیرپور: دریائے سندھ میں پانی کی سطح میں اضافہ ہونے سے پیرجوگوٹھ اور گمبٹ کے کچے کے علاقے زیر آب آ گئے ہیں۔
تفصیلات کے مطابق صوبہ سندھ میں سیلاب کے باعث پیرجوگوٹھ اور گمبٹ کے 70 سے زائد علاقوں کا زمینی رابطہ منقطع ہو گیا ہے، صادق کلہوڑو، ملاں جاپتن، کیٹی گھمرا سمیت دیگر علاقوں میں لوگ پھنس گئے۔
انتظامیہ کی جانب سے متاثرہ افراد کو ریسکیو کرنے کے اقدامات تاحال نہیں کیے گئے، متاثرہ علاقوں میں سیکڑوں ایکڑ پر جوار، کپاس، تل، مکئی سمیت دیگر فصلیں زیر آب آ گئی ہیں۔
ادھر گھوٹکی میں قادرپور کے مقام پر پانی کی سطح میں مسلسل اضافہ ہو رہا ہے، انتظامیہ کی جانب سے ممکنہ سیلاب کے پیش نظر ایری گیشن عملے کو الرٹ رہنے کی ہدایت جاری کی گئی ہے، ڈپٹی کمشنر نے ایگزیکٹو انجنیئر کو دریا کے حفاظتی بند کی نگرانی کی ہدایت کی۔
ڈپٹی کمشنر عثمان عبداللہ نے کہا محکمہ ایریگیشن کے تمام ملازمین کی چھٹیاں منسوخ کر دی گئی ہیں، دریا کے حفاظتی بند پر ایری گیشن عملے کی غیر حاضری پر سخت کاروائی ہوگی، انھوں نے ہدایت کی کہ دریا کی حدود میں رہائشی مکین فوری طور محفوظ مقامات پر منتقل ہو جائیں۔
واضح رہے کہ دریائے سندھ میں گھوٹکی کے مقام سے 4 لاکھ کیوسک سے زائد کا ریلا گزر رہا ہے۔
