اوٹاوا : کینیڈا کی حکومت نے دنیا بھر سے لاکھوں غیرملکیوں کو خوش آمدید کہنے کا عندیہ دیا ہے جنہیں ملک میں مستقل رہائشی سہولت فراہم کی جائے گی۔
تفصیلات کے مطابق حکومت کینیڈا نے آئندہ تین سال تک تارکین وطن کی تعداد میں اضافے کے اپنے ہدف کو برقرار رکھنے کا فیصلہ کیا ہے۔
غیر ملکی خبر رساں ادارے کی رپورٹ کے مطابق امیگریشن کے وزیر مارک ملر نے پارلیمنٹ میں اگلے تین سال کے لیے نئے اہداف پیش کیے ہیں جس کے مطابق سال 2026تک 5لاکھ تارکین وطن ملک میں مستقل رہائش اختیار کرسکیں گے۔
کینیڈا کے وزیر برائے امیگریشن مارک ملر نے مستقبل کے امیگریشن پلان کا اعلان کرتے ہوئے بتایا کہ آئندہ تین سال تک نئے تارکین وطن کی تعداد میں اضافہ کیا جائے گا تاہم ان کی تعلیم اور مہارت کے حوالے سے کچھ تبدیلیاں متوقع ہیں۔
مارک ملر کا کہنا ہے کہ کینیڈا 2026 تک 500,000 تارکین وطن کو خوش آمدید کہے گا، حکومت سال2023میں 465,000 اور 2024 میں 485,000 افراد کو مستقل رہائش دینے کا ارادہ رکھتی ہے جن کی تعداد 2025 تک 500,000 تک پہنچانے کا منصوبہ ہے، یاد رہے کہ 2015 میں امیگریشن کا ہدف تین لاکھ سے کم تھا۔
کینیڈا کے امیگریشن کے وزیر مارک ملر نے یہ بھی اعتراف کیا کہ حالیہ برسوں میں کینیڈا کے امیگریشن سسٹم میں کچھ خامیاں ہیں اور وہ اسے بہتر کریں گے۔
دوسری جانب موجودہ حکومت تنقید کی زد میں ہے کہ تارکین وطن کی بڑھتی ہوئی تعداد سے رہائش کی فراہمی اور صحت کی دیکھ بھال کا نظام متاثر ہو رہا ہے۔
