کراچی: شہر قائد کے علاقے تین تلوار میں پولیس اور پی ٹی آئی کارکنان میں جھڑپ کا مقدمہ درج کر لیا گیا، جس میں صوبائی قیادت سمیت 131 افراد کو نامزد کیا گیا ہے۔
تفصیلات کے مطابق کراچی کے علاقے تین تلوار کے قریب پولیس اور پی ٹی آئی کارکنان میں جھڑپ کا مقدمہ درج کر لیا گیا، مقدمے میں پی ٹی آئی کی صوبائی قیادت سمیت 131 افراد نامزد کیے گئے ہیں، جن میں خرم شیر زمان، فہیم خان، سعید آفریدی اور عدیل احمد سمیت دیگر 75 رہنما شامل ہیں۔
پولیس حکام کا کہنا ہے کہ مقدمہ 4 سے 5 ہزار پی ٹی آئی کارکنان کے خلاف درج کیا گیا ہے، جس میں دہشت گردی، سرکاری املاک پر حملے، ہنگامہ آرائی، بلوہ، لوٹ مار سمیت دیگر دفعات شامل ہیں، یہ مقدمہ سرکار کی مدعیت میں تھانہ فریئر میں درج کیا گیا ہے۔
ایف آئی آر کے متن کے مطابق 2 روز سے سوشل میڈیا کے ذریعے پر تشدد احتجاج کے لیے کارکنان کو تیار کیا جا رہا تھا، ریلیوں کی شکل میں 4 سے 5 ہزار کارکن تین تلوار پہنچے، جن کے پاس ریلی یا جلسے کا اجازت نامہ نہیں تھا۔
مقدمے کے متن کے مطابق تین تلوار چوک پر اطراف میں ٹریفک کو روکا گیا، پی ٹی آئی رہنماؤں نے کارکنان کو اشتعال دلایا اور پولیس پر حملہ کر دیا، فائرنگ اور پتھراؤ سے خوف و ہراس پھیلا، کاروبار بند ہوا اور بھگدڑ مچی، اس ہنگامہ آرائی میں 15 افراد گرفتار ہوئے، اور جائے وقوعہ سے نائن ایم ایم کے 4 خول ملے۔
