وفاقی وزیر امیر مقام نے کہا ہے کہ پاکستان کا پرچم اتارنا ناقابل برداشت ہے، پاکستانی پرچم کی توہین کرنیوالوں کومعاف نہیں کیا جائےگا۔
وفاقی وزیر امور کشمیر امیر مقام نے فرینکفرٹ میں پاکستانی قونصل خانے پر افغان شہریوں کے حملے کی مذمت کرتے ہوئے کہا کہ شرپسند عناصر کا پاکستان کے پرچم کو اتارنا ناقابل برداشت ہے، بیرون ملک مقیم افغان شرپسند میزبانی اور مہمان نوازی کا یہ بدلہ دے رہے ہیں۔
انھوں نے کہا کہ جرمن حکومت شرپسندوں کے خلاف کارروائی کرے، اس واقعے کے بعد افغان مہاجرین کے حوالے سے ہمیں پالیسی کا جائزہ لینا ہوگا۔
امیر مقام کا کہنا تھا کہ افغان حکومت اپنے شرپسند شہریوں کیخلاف قانونی کارروائی کرے، ایسے واقعات سے یہاں مقیم افغان مہاجرین کیلئے بھی مشکلات پیدا ہوں گی۔
انھوں نے کہا کہ ایک سفارت خانے کی حفاظت میزبان ملک کی ذمہ داری ہوتی ہے، جرمن حکومت عالمی قانون کے مطابق اقدامات کرے۔
وفاقی وزیر امیر مقام کا مزید کہنا تھا کہ ایسے اقدام کرنے والے پاکستان اور افغانستان کے تعلقات کیخلاف سازش کررہے ہیں۔
