اسلام آباد: ضلعی انتظامیہ نے پاکستان تحریک انصاف (پی ٹی آئی) کے کل ہونے والے ترنول جلسے کا این او سی منسوخ کر دیا۔
چیف کمشنر اسلام آباد کی زیرِ صدارت انٹیلی جنس کمیٹی کے اجلاس میں ہوا جس میں پی ٹی آئی کے جلسے کیلیے این او سی کی منسوخی کا فیصلہ کیا گیا۔
اجلاس میں ضلعی انتظامیہ کا کہنا تھا کہ کل مذہبی جماعتوں نے بھی احتجاج کی کال دے رکھی ہے لہٰذا ایسی صورتحال میں جلسے کی اجازت نہیں دی جا سکتی ہے۔
دوسری جانب، صدر پی ٹی آئی اسلام آباد عامر مغل نے اپنے بیان میں کہا کہ 22 اگست کو ترنول چوک پشاور روڈ پر جلسہ ہوگا، انتظامیہ نے این اوسی منسوخ کیا ہے لیکن ہم نے جلسہ منسوخ نہیں کیا۔
عامر مغل نے کہا کہ کمیٹی کا متفقہ فیصلہ ہے ترنول میں جلسہ ضرور ہوگا، پُرامن سیاسی جدوجہد آئینی و قانونی حق ہے جسے سرنڈر نہیں کریں گے، عوام کو 22 اگست کی شام 4 بجے پُرامن جلسے کی دعوت دیتا ہوں۔
انہوں نے کہا کہ پُرامن سیاسی جدوجہد سے نہیں روکا جا سکتا۔
اب سے کچھ دیر قبل پولیس حکام پی ٹی آئی کے ترنول میں جلسہ گاہ پہنچے جہاں انصاف لائرز فورم کے وکلا بھی موجود ہیں۔