کراچی کے چڑیا گھر میں نئے مہمانوں کی آمد نے آنے والوں کو مسرور کر دیا ہے کالے اور سفید ہرن اور وائٹ افریقی شیرنی نے بچوں کو جنم دیا ہے۔
کراچی کے چڑیا گھر میں نئے ننھے منے مہمانوں کی آمد ہوئی ہے اور مختلف نسل کی ہرنیوں نے 9 بچوں کو جنم دیا ہے جب کہ ایک سفید افریقی شیرنی کے ہاں بھی ننھے شیر کی پیدائش ہوئی ہے۔
فیلو ہرنیوں نے 6 بچوں کو، بلیک بک ہرن کی مادہ نے ایک، وائٹ فیلو ہرن کی مادہ نے ایک اور اسپوٹٹ ہرن کی مادہ نے بھی ایک بچے کو جنم دیا ہے جبکہ وائٹ افریقن شیرنی کے ہاں بھی ایک بچے کی پیدائش ہوئی ہے۔
افریقن شیرنی کے یہاں بچہ کی پیدائش تین روز قبل ہوئی، چڑیا گھر انتظامیہ کے مطابق کچھ عرصہ کے لیے شیرنی کے بچہ کو عوام سے دور رکھا جائے گا یہ افریقی شیر کی جوڑی رواں سال مارچ میں زو انتظامیہ کو تحفے میں ملی تھی۔
چڑیا گھر انتظامیہ نے بتایا کہ وائٹ فیلو ہرن، ہرنوں کی ایک نایاب نسل ہے۔
سینئر ڈائریکٹر کراچی چڑیا گھرکے مطابق افریقن شیرنی کے یہاں بچہ کی پیدائش تین روز قبل ہوئی ہے، جبکہ کچھ عرصہ کے لیے شیرنی کے بچے کو عوام سے دور رکھا جائے گا، افریقی شیر کی جوڑی رواں سال مارچ میں زو انتظامیہ کو تحفہ میں ملی تھی۔
کراچی چڑیا گھرمیں آئے ننھے مہمانوں نے خوبصورتی کو چار چاند لگا دیے اور شہری بھی نئے مہمانوں کو دیکھنے پہنچ گئے ہیں۔
دوسری جانب مئیر کراچی مرتضیٰ وہاب نے بچوں کو سستی تفریح فراہم کرنے کے لیے پلے ایریا اور نئے جھولوں کا بھی افتتاح کر دیا ہے۔ شہریوں نے نئے فن لینڈ کو خوش آئند قرار دیا ہے۔
