ایران نے ایک بار پھر دیگر ممالک کو خبردار کیا ہے کہ وہ اسرائیل کے خلاف تنازع میں خود کو نہ الجھائیں، ورنہ انہیں بھی جائز ہدف تصور کیا جائے گا۔
بین الاقوامی خبر رساں ادارے کی رپورٹ کے مطابق ایران نے اقوام متحدہ میں اپنے مشن کے ذریعے اسرائیل کے ساتھ جاری تنازع پر اہم بیان جاری کیا ہے۔
عرب میڈیا کی رپورٹس کے مطابق ایرانی مشن نے خبردار کرتے ہوئے کہا ہے کہ ہمارا ردعمل صرف حملہ آور کے خلاف ہوگا، اگر کسی ملک نے حملہ آور کی مدد کی تو اسے شریکِ جرم اور جائز ہدف سمجھا جائے گا۔
ایرانی مشن کے مطابق ہم دیگر ممالک کو مشورہ دیتے ہیں کہ وہ اسرائیل اور ایران کے تنازع میں خود کو نہ الجھائیں اور اس معاملے سے دور رہیں۔
واضح رہے کہ ایران کا یہ بیان سلامتی کونسل کے ایک اہم اجلاس کے تقریباً 24 گھنٹے بعد سامنے آیا ہے، جو بدھ کی صبح تقریباً تین گھنٹے تک جاری رہا تھا۔
ایرانی سفیر امیر سعید ایروانی کا اس اجلاس میں کہنا تھا کہ اسرائیل پر ایرانی حملہ اقوام متحدہ کے چارٹر کے آرٹیکل 51 کے تحت اپنے دفاع میں کیا گیا۔
ایران نے معطل پروازیں بحال کر دیں
ایرانی سفیر کا مزید کہنا تھا کہ اگر ایران کے خلاف کوئی بھی جارحیت کی گئی تو ایران مزید دفاعی اقدامات کرنے کے لیے پوری طرح تیار ہے۔
