اسلام آباد: ملک میں پیٹرولیم مصنوعات کی اسمگلنگ سے قومی خزانے کو بڑا نقصان پہنچایا جا رہا ہے، اس سلسلے میں سالانہ 396 ارب روپے کی اسمگلنگ کا انکشاف ہوا ہے۔
حکومتی ذرائع کے مطابق پیٹرولیم مصنوعات کی اسمگلنگ کے خلاف کریک ڈاؤن کی تیاری کر لی گئی، ملک بھر میں غیر قانونی پیٹرول پمپس کے خلاف کارروائی کی جائے گی۔
ذرائع کا کہنا ہے کہ پیٹرولیم مصنوعات کی اسمگلنگ روکنے کے لیے مزید اقدامات کا پلان تیار کیا گیا ہے، ایف بی آر نے پیٹرولیم سے متعلق قوانین میں ترامیم کی تجاویز دے دی ہیں، جن میں کہا گیا ہے کہ ضلعی انتظامیہ کو غیر قانونی پیٹرول پمپس سیل کرنے کا اختیار دیا جائے۔
ایف بی آر کی تجاویز کے مطابق ضلعی انتظامیہ کو غیر قانونی پیٹرول پمپس کی مشینری اور آلات ضبط کرنے کا اختیار دیا جائے، ملک بھر میں پیٹرول پمپس کی ڈیجیٹلائزیشن کی جائے، اور پیٹرول پمپس پر سم بیسڈ ٹیکنالوجی کے ذریعے فروخت مانیٹر کی جائے۔
دیگر تجاویز میں پیٹرول پمپس پر اسٹاکس کی ریئل ٹائم مانیٹرنگ، غیر قانونی پیٹرول پمپس کی تلاش کے لیے اپلیکیشن تیار کرنا، جی آئی ایس موبائل ایپلیکشن تیار کر کے پیٹرول پمپس تلاش کرنا، اور آئل مارکیٹنگ کمپنیوں کو موبائل ایپلیکشن پر ریئل ٹائم اپ ڈیٹ کا پابند کرنا شامل ہیں۔
