لبنان کی مزاحمتی تنظیم حزب اللہ نے اسرائیل پر راکٹ حملے کئے ہیں، جس کے باعث 5 افراد ہلاک جبکہ ایک کے زخمی ہونے کی اطلاع ہے۔
بین الاقوامی خبر رساں ادارے کی رپورٹ کے مطابق حزب اللہ نے راکٹ حملہ شمالی سرحد کے قریب متولا قصبے کے قریب کیا، جس میں 5 افراد ہلاک اور ایک شدید زخمی ہوا ہے۔
رپورٹس کے مطابق راکٹ حملوں میں مرنے والوں میں ایک اسرائیلی شہری تھا، جبکہ باقی 4 غیر ملکی شہری تھے، جبکہ زخمی شخص کی حالت تشویشناک بتائی جارہی ہے۔
اس سے قبل امریکی میڈیا نے دعویٰ کیا ہے کہ ایران ممکنہ طور پر 5 نومبر کو امریکی انتخابات سے قبل اسرائیل پر جوابی حملہ کرے گا۔
رپورٹ کے مطابق امریکی میڈیا کا اس حوالے سے کہنا ہے کہ اسرائیلی جارحیت کے خلاف اسلامی جمہوریہ ایران کا ردِعمل حتمی اور تکلیف دہ ہو گا۔
دوسری جانب وائٹ ہاؤس کے ترجمان نے ایران کو خبردار کرتے ہوئے کہا ہے کہ ایران کو اسرائیلی حملے کا جواب نہیں دینا چاہیے۔ اگر ایران جواب دینے کا انتخاب کرتا ہے، تو امریکا اسرائیل کے دفاع کے لیے موجود ہے۔
’جمشید شرمہد کو پھانسی دی تو‘۔۔ جرمنی نے ایران کو دھمکی دیدی
یاد رہے کہ اسرائیل نے یکم اکتوبر کو ایرانی حملے کے جواب میں 26 اکتوبر کو ایران پر اٹیک کیا تھا، ایران نے اسرائیل کے فوجی اہداف پر حملوں میں 2 فوجی اہلکاروں کی شہادت کا اعلان کیا تھا۔
