اسلام آباد : سابق وفاقی وزیر فواد چوہدری کا کہنا ہے کہ بانی پی ٹی آئی کی بہنوں اور اہلیہ کو تحریک کو لیڈ کرنا چاہیے کیونکہ جب تک بانی پی ٹی آئی کا خاندان درمیان نہیں آئے گا اعتماد نہیں بنے گا۔
تفصیلات کے مطابق سابق وفاقی وزیر فواد چوہدری نے اے آر وائی نیوزکے پروگرام خبر میں گفتگو کرتے ہوئے کہا کہ بانی پی ٹی آئی کی جانب سےپیغام آگیا انشااللہ جلد ملاقات بھی ہوجائے گی، بانی پی ٹی آئی کےپیغام کی وجہ سےکھل کرنہیں بول سکتا۔
سابق وفاقی وزیر کا کہنا تھا کہ 9 فروری کوالیکشن نتائج چوری ہو رہے تھے تو پی ٹی آئی والےگھربیٹھےتھے، 9 فروری کواحتجاج کرتے تو ایک لیاقت چٹھہ کا استعفیٰ نہ آتا لائنز لگ جاتیں۔
انھوں نے کہا کہ پی ٹی آئی کو اپوزیشن جماعتوں کیساتھ اتحاد کرنا چاہیے تھا وہ بھی نہیں ہوسکا، اب بانی پی ٹی آئی کی بہنوں اور اہلیہ کو تحریک کو لیڈ کرنا چاہیے۔
سابق وزیر نے مزید کہا کہ پی ٹی آئی سے انقلاب ہینڈل نہیں ہوپارہا، دباؤ بنانا ہے تو سیاسی اتحاد بنانا ہوگا اور سیاسی جماعتوں سے اتحاد کرنا ہوگا۔
انھوں نے زور دیا کہ مولانافضل الرحمان کوساتھ ملاناہوگاتاکہ حکومت پردباؤڈال سکیں لیکن موجودہ پی ٹی آئی قیادت کوسمجھ نہیں آرہی کہ بات کس سےکریں۔
فواد چوہدری نے گفتگو میں کہا کہ جب تک بانی پی ٹی آئی کا خاندان درمیان نہیں آئے گا اعتماد نہیں بنےگا، پی ٹی آئی کی موجودہ قیادت نے بڑے بڑے مواقع گنوا دیئےہیں، اسٹریٹ موومنٹ چلائیں گے تو ڈر ہے اس کا فائدہ اورلوگ اٹھاسکتےہیں۔
ان کا مزید کہنا تھا کہ گرینڈ ڈائیلاگ کے ذریعے کچھ لو اور کچھ دو پالیسی پرعمل کیاجاسکتاہے، موجودہ پی ٹی آئی میں کسی کا اتنا بڑا قد نہیں کہ بانی کی رہائی کیلئے تحریک چلاسکے۔
