اسلام آباد: وفاقی وزیر داخلہ محسن نقوی کا کہنا ہے کہ پاکستان تحریک انصاف (پی ٹی آئی) کے احتجاج کے دوران جو بھی جانی و مالی نقصان ہوا ہے اس کی ذمہ دار ایک عورت ہے۔
محسن نقوی نے وزیر اطلاعات و نشریات عطا اللہ تارڑ کے ہمراہ پریس کانفرنس میں کہا کہ کس طرح کے لوگ احتجاج کرنے آئے ہیں یہ سب نے دیکھ لیا، ان کی کوشش ایک ہی تھی کہ کسی طرح لاشیں گریں لیکن وزیر اعظم شہباز شریف کی واضح ہدایات تھیں کہ امن قائم رکھنا ہے اور لاشیں نہیں گرنی چاہیے۔
محسن نقوی نے کہا کہ وزیر اعظم شہباز شریف کی زیرِ صدارت اجلاس میں فیصلہ ہوا دھرنے والوں سے کوئی مذاکرات نہیں ہوں گے۔ انہوں نے کہا کہ احتجاج میں شامل لوگوں کے پاس ہر قسم کا اسلحہ، غلیل اور لاٹھیاں موجود ہیں، ہمیں احساس ہے عوام کو سکیورٹی دینے کی کوشش کر رہے ہیں مگر کیا کریں؟
یہ بھی پڑھیں: علی امین گنڈاپور سے قافلہ آگے نہ بڑھانے پر کارکنان کی تکرار
عطا اللہ تارڑ نے پریس کانفرنس میں کہا کہ پاکستان میں دوست ملک کے سربراہ آئے ہوئے ہیں جن کے تجارتی معاہدے ہو رہے ہیں، ریاست بالکل کمزور نہیں ہے شیل یا کنچے چلا کر کسی کو رہا کر لیں گے تو یہ نہیں ہو سکتا، مٹھی بھر شرپسندوں نے چڑھائی کی ہے، کس جمہوریت میں ایسا ہوتا ہے کہ افغان شہریوں کو پارٹی ممبرشپ دیں؟
وزیر اطلاعات نے کہا کہ جو لوگ گرفتار کیے گئے ان میں ایک صاحب نے کہا کہ انہیں پیسے دیے گئے ہیں، ایک 16 سال کا لڑکا گرفتار کیا اس نے پشتو میں کہا کہ افغانستان سے آیا ہوں۔
انہوں نے کہا کہ بشریٰ بی بی علی امین گنڈاپور کو کہتی ہیں آپ لیڈ کریں، اپنے بچوں کو بیرون ملک رکھا ہوا ہے انہیں بھی یہاں بلائیں، کیا این آر او مانگ رہے ہیں ڈیل مانگ رہے ہیں تمام کیسز عدالتوں میں ہیں وہاں رجوع کریں، یہ بی بی آئی ہے لاشیں اور خون لینے اسی لیے علی امین گنڈاپور کو کہتی ہیں لیڈ کریں۔
ان کا کہنا تھا کہ آپ آئیں ڈی چوک آئیں ہم کنٹینر کے آگے کھڑے ہیں پیچھے نہیں، گولی چلانا سب سے آسان کام ہے ایک فائر ماریں تو سب ختم ہو جائے گا، ریاست کے صبر کو آزمایا جا رہا ہے یہ ریاست کو چیلنج کرنے آئے ہیں، ریاست کی کوئی کمزوری نہیں ہے یہ شرپسند افغان شہریوں کو آگے لگایا ہوا ہے۔
