اسلام آباد: پاکستان تحریک انصاف ( پی ٹی آئی )کی جانب سے اسلام آباد میں احتجاج کے دوران مبینہ جانی نقصان پر کل یوم سیاہ کے طور پر منانے کا امکان ہے۔
تفصیلات کے مطابق تحریک انصاف کی سیاسی کمیٹی کااسلام آباد میں اجلاس ہوا، جس میں احتجاج کے دوران واقعات کے بعد کی صورت حال پر مشاورت کی گئی۔
اس موقع پرواقعات کے دوران مبینہ جانی نقصان پر قانونی چارہ جوئی پر غور کیا گیا، کل یوم سیاہ کے طور پر منانے کا امکان ہے۔
اس حوالے سے پی ٹی آئی با ضابطہ لائحہ عمل کا جلد اعلان کرے گی۔
یاد رہے گذشتہ روز وزیراعلی خیبر پختونخوا نے پی ٹی آئی احتجاج کے دوران جاں بحق ہونے والے پارٹی کارکنوں کے لیے ایک ایک کروڑ روپے کا اعلان کیا تھا۔
وزیراعلیٰ کے پی علی امین گنڈاپور نے مانسہرہ میں پریس کانفرنس کرتے ہوئے کہا تھا کہ ہم پر براہ راست گولیاں برسائی گئیں۔ بشریٰ بی بی میرے ساتھ تھیں، ان پر بھی حملہ کیا گیا۔ جو لوگ کل متاثر ہوئے، ان ہزاروں کارکنان کا ڈیٹا بھی آ رہا ہے۔
ان کا کہنا تھا کہ بانی پی ٹی آئی عمران خان نے پُر امن احتجاج کی کال دی تھی اور ان کی کال پر دھرنا جاری ہے جب تک کال اپ نہیں ہوگی، یہ جاری رہے گا۔
