کراچی: سہراب گوٹھ میں مختلف مقامات پولیس سرپرستی میں منشیات کے اڈے قائم ہیں، اور جنت گل ٹاؤن، ایوب گوٹھ اور اطراف کے علاقوں میں منظم منشیات فروشی جاری ہے۔
تفصیلات کے مطابق کراچی کے علاقے سہراب گوٹھ پولیس کی سرپرستی میں ہونے والی منشیات فروشی نوجوان نسل کو تباہ کرنے لگی، جب کہ علاقے کے ایس ایچ او وزیر سموں کریمنل ریکارڈ یافتہ نکلا ہے۔
سب انسپکٹر وزیر سموں اے وی سی سی میں تعیناتی کے دوران سرکاری دفتر سے منشیات فروشی میں ملوث رہا ہے، اس کے خلاف اینٹی نارکوٹکس فورس نے مقدمہ بھی درج کیا تھا۔
علاقہ مکین شکایت کر رہے ہیں کہ یہاں پولیس کی سرپرستی میں منشیات کے اڈے قائم ہیں، علاقے میں کھلے عام منشیات فروشی سے نوجوان نسل تباہ ہو رہی ہے، ان کا مطالبہ ہے کہ اعلیٰ پولیس افسران کالی بھیڑوں کے خلاف کارروائی کریں۔
ایس ایچ او وزیر سموں نے اپنا مؤقف بیان کرتے ہوئے کہا ہے ’’اے وی سی سی میں تعیناتی کے دوران مجھ پر کیس ہوا تھا، میں نے 3 سال جیل بھی کاٹی، اور ٹرائل کے بعد باہر آیا ہوں، اور سہراب گوٹھ میں میرٹ پر تعینات کیا گیا ہے۔‘‘
9 سیکنڈز میں 55 لاکھ کی ڈکیتی، ویڈیو سامنے آ گئی
ایس ایچ او نے دعویٰ کیا ’’میں نے سہراب گوٹھ میں منظم جرائم کا خاتمہ کر دیا ہے، لیکن علاقے میں کچھ لوگ مجھ سے ناخوش ہیں، اس لیے میرے خلاف سازش ہو رہی ہے۔‘‘
