ملتان سلطانز نے عباس آفریدی کی شاندار بولنگ کی بدولت اسلام آباد یونائیٹڈ کو 52 رنز سے شکست دیتے ہوئے ہوم گراؤنڈ میں فتح کی ہیٹ ٹرک کرلی۔
تفصیلات کے مطابق ملتان اسٹیڈیم میں کھیلے جارہے پی ایس ایل کے ساتویں میچ میں ملتان سلطانز نے اسلام آباد یونائیٹڈ کو 52رنز سے شکست دے دی۔
ایک سو اکانوے رنز ہدف کے تعاقب میں اسلام آباد یونائیٹڈ کی ٹیم 138 رنز پر ڈھیر ہوگئی، عباس آفریدی نے شاندار بولنگ کرتے ہوئے 4 کھلاڑیوں کو آؤٹ کیا۔
یہ بھی پڑھیں: ویڈیو: اسامہ میر کا شاندار کیچ
روسی وینڈرڈیوسن، جارح مزاج بیٹر اعظم خان، محمد وسیم جونیئر اور فہیم اشرف عباس آفریدی کا شکار بنے۔ محمد الیاس ، احسان اللہ اور اسامہ میر نے بھی دو دو وکٹیں حاصل کیں۔
اسلام آباد یونائیٹڈ کی جانب سے روسی وینڈرڈیوسن نے جارحانہ 49 رنز بنائے جو ٹیم کے کام نہ آسکے، کولم منرو کے 31 رنز بھی رائیگاں گئے۔اس کے علاوہ یونائیٹڈ کو کوئی بیٹر شاندار کارکردگی نہ دکھاسکا۔
Three wins on the trot for the #SultanSquad as we beat the #Shehrus #LetsPlaySaeen #HBLPSL8 pic.twitter.com/LDKTGWs73W
— Multan Sultans (@MultanSultans) February 19, 2023
اس سے قبل ملتان سلطانز نے ڈیوڈ ملر کی دھواں دھار بیٹنگ کی بدولت اسلام آباد یونائیٹڈ کو جیت کے لیے 191 رنز کا ہدف دیا تھا۔
ڈیوڈ ملر نے صرف 25 گیندوں پر 52 رنز کی دھواں دھار اننگ کھیلی، ان کی اننگ میں 4 بلند وبالا چھکے اور تین چوکے شامل تھے۔
That is a stunning catch!!! @iAbbasAfridi55 takes a blinder off his own bowling to remove Faheem. #Shehrus are 132/7 off 16.4 overs.#MSvIU #LetsPlaySaeen pic.twitter.com/fOYYOHcdRx
— Multan Sultans (@MultanSultans) February 19, 2023
واضح رہے کہ اسلام آباد یونائیٹڈ نے ٹاس جیت کر پہلے فیلڈنگ کا فیصلہ کیا جو ابتدا میں ہی درست ثابت ہوا۔ سلطانز کے اوپنر شان مسعود 3 کے انفرادی اسکور پر رومان رئیس کو وکٹ دے کر پویلین لوٹ گئے۔ تاہم اس کے بعد کپتان محمد رضوان کے ساتھ رلی روسو نے چارج سنبھالا اور میدان کے چاروں اطراف خوبصورت شاٹس کھیلے۔
دونوں کھلاڑیوں کے درمیان 91 رنز کی پارٹنر شپ ہوئی۔ 95 کے مجموعے پر محمد رضوان نصف سنچری مکمل کرتے ہی شاداب خان کی گیند پر ایل بی ڈبلیو ہوگئے۔ رلی روسو نے 36 رنز کی اننگ کھیلی۔
میچ کے آخری لمحات میں کیرون پولارڈ نے اپنے بلے سے جادو جگایا اور 21 گیندوں کا سامنا کرتے ہوئے 32 رنز بنائے۔ اسلام آباد یونائیٹڈ کی جانب سے شاداب خان، رومان رئیس، محمد وسیم اور ٹام کوران نے ایک ایک وکٹ حاصل کی۔
دونوں ٹیموں نے آج کے میچ کے لیے ایک ایک تبدیلی کی ہے۔ ملتان سلطانز میں ثمین گل کی جگہ الیاس کو ٹیم میں شامل کیا گیا ہے جب کہ اسلام آباد یونائیٹڈ میں آصف علی کی جگہ ابرار احمد نے پلیئنگ اسکواڈ میں جگہ پائی ۔
