کراچی: ممتاز فلم اور ٹی وی اداکار قوی خان نے زندگی کی 86 بہاریں دیکھ لیں۔
تفصیلات کے مطابق لیجنڈی اداکار قوی خان نے 86 برس کے ہوگئے، قوی خان نے چائلڈ ایکٹر کے طور پر ریڈیو پاکستان کے ڈراموں سے کام شروع کیا اور پی ٹی وی کے پہلے اداکار کے طور پر انہوں نے اپنے کیریئر کا آغاز کیا۔
قوی خان نے 200 فلموں اور لاتعداد ٹی وی ڈراموں میں اداکاری کے جوہر دکھائے۔
قوی خان کے مشہور ٹی وی ڈراموں میں اندھیرا اجالا، دو قدم دور تھے، من چلے کا سودا، میرے قاتل میرے دلدار، در شہوار، زندگی دھوپ تم گھنا سایا، الف اللہ اور انسان سمیت متعدد ڈرامے شامل ہیں۔
قوی خان کی چند شہرہ آفاق فلموں میں محبت زندگی ہے، سوسائٹی گرل، چاند سورج، سرفروش، کالے چور، زمین آسمان، رانگ نمبر، مہر النساء اور پری شامل ہیں۔
اداکار قوی خان پاکستان ٹیلی ویژن کے پہلے اداکار تھے جنہیں 1980ء میں پرائیڈ آف پرفارمنس ایوارڈ سے نوازا گیا ،محمد قوی خان ستارہ امتیاز ، تین نگار ایوارڈز ، پی ٹی وی ایوارڈ اورریڈیو پاکستان اور پاکستان ٹیلی وژن کے لائف اچیومنٹ ایوارڈ بھی حاصل کرچکے ہیں۔
