اسلام آباد : ایشیائی ترقیاتی بینک نے رواں مالی سال پاکستان کی معاشی بحالی کے امکانات ظاہر کردیئے اور گذشتہ مالی سال کے مقابلے میں مہنگائی میں بھی کمی کی پیش گوئی بھی کی۔
تفصیلات کے مطابق ایشیائی ترقیاتی بینک نے پاکستان کی معاشی ترقی کی شرح سےمتعلق رپورٹ جاری کردی ، جس میں رواں مالی سال معاشی بحالی کے امکانات ظاہر کرتے ہوئے 2023 کے مقابلے 2024 میں پاکستان کی معاشی ترقی کی شرح بڑھنے کی پیش گوئی کردی۔
پاکستان کی معیشت مالی سال2024 میں 1.9فیصدتک بحال ہوجائے گی جبکہ گزشتہ مالی سال کے دوران معیشت 0.3 فیصد کمی کا شکار ہوئی تھی۔
رپورٹ میں کہا گیا کہ رواں مالی سال پاکستان میں عام انتخابات کے انعقاد اورمعاشی ایڈجسٹمنٹ پروگرام پر عمل درآمد سے سرمایہ کاروں کا اعتماد اور درآمدات پر رکاوٹوں میں نرمی سے سرمایہ کاری بڑھے گی-
رپورٹ کے مطابق بجلی کی قیمتوں میں اضافے اور ڈالر کے مقابلے میں روپے کی بے قدری سے مہنگائی پر دباؤ بڑھے گا اور ڈالر کےمقابلے روپے کی مسلسل کمزوری افراط زر کے دباؤ کو بلند رکھے گی۔
ایشیائی ترقیاتی بینک کا کہنا تھا کہ میکرو اکنامک استحکام اور گروتھ کی بحالی کیلئے معاشی ایڈجسٹمنٹ پروگرام ضروری ہے، رواں مالی سال پاکستان کی معاشی شرح نمو ایک اعشاریہ نو فیصد رہنے کا امکان ہے جبکہ گذشتہ مالی سال پاکستان کی معاشی شرح نمو صفر اعشاریہ تین فیصد تھی
رپورٹ میں بتایا گیا کہ معاشی بحالی کیلئے پالیسی اصلاحات کرنا ہوں گی اور ایکسچنج ریٹ کا تعین مارکیٹ پر چھوڑدیا جائے-
ایشیائی ترقیاتی بینک نے رپورٹ میں توانائی شعبے میں اصلاحات پر زور دیتے ہوئے کہا کہ رواں مالی سال پاکستان میں اوسط مہنگائی کی شرح پچیس فیصد رہنے کا امکان ہے جبکہ گذشتہ مالی سال پاکستان میں اوسط مہنگائی کی شرح انتیس اعشاریہ دو فیصد تھی۔
رپورٹ میں کہنا تھا کہ رواں مالی سال الیکشن ہونے سے پاکستان کی معیشت کو سنبھل سکتی ہے، مالی سال2024کےدوران الیکشن سےپاکستان کی معیشت کواعتماد ملے گا تاہم مالی سال 2024کےدوران مہنگائی،معاشی چیلنجزکا سامنا رہے گا۔
