اسلام آباد: افغانستان کے وزیر داخلہ اور افغان خفیہ ایجنسی نیشنل ڈائریکٹوریٹ آف سیکیورٹی (این ڈی ایس) کے سربراہ پر مشتمل دو رکنی وفد پاکستان پہنچ گیا۔ وفد آج پاکستانی حکام سے مذاکرات کرے گا۔
تفصیلات کے مطابق پاکستانی حکام سے باہمی امور پر مذاکرات کے لیے افغان کا اعلیٰ سطح کا وفد اسلام آباد پہنچ گیا۔
دفترخارجہ کے ترجمان ڈاکٹر فیصل نے سماجی رابطے کی ویب سائٹ ٹویٹر پر ٹویٹ کرتے ہوئے بتایا کہ افغان حکومت نے اعلیٰ سطح کا وفد پاکستان بھیجنے کی خواہش کا اظہار کیا تھا جو آج اسلام آباد پہنچ چکا ہے۔
ترجمان دفتر خارجہ کے مطابق وفد میں افغان وزیر داخلہ اور این ڈی ایس کے سربراہ شامل ہیں۔ وفد افغان صدر اشرف غنی کا پیغام لے کر آیا ہے۔
ترجمان کے مطابق افغان وفد دونوں ممالک میں تعاون سمیت دیگر باہمی امور پر پاکستانی حکام سے بات چیت کرے گا۔
یاد رہے کہ رواں ہفتے افغانستان میں دہشت گردی کی نئی لہر اٹھی ہے اور یکے بعد دیگرے افغانستان کے اہم علاقوں کو بم دھماکوں اور حملوں کا نشانہ بنایا جا چکا ہے۔
پاکستانی دفتر خارجہ نے افغانستان میں ہونے والے تمام حملوں کی مذمت کرتے ہوئے افغان عوام سے اظہار یکجہتی کیا۔
اگر آپ کو یہ خبر پسند نہیں آئی تو برائے مہربانی نیچے کمنٹس میں اپنی رائے کا اظہار کریں اور اگر آپ کو یہ مضمون پسند آیا ہے تو اسے اپنی فیس بک وال پر شیئر کریں۔
