لاہور: چیئرمین پی ٹی آئی عمران خان اور پی ٹی آئی کراچی قیادت کی ملاقات کی اندرونی کہانی سامنے آ گئی ہے، عمران خان نے اجلاس میں کہا کہ میں آفتاب حسین صدیقی کو کراچی کا صدر منتخب کر رہا ہوں، سب سپورٹ کریں۔
تفصیلات کے مطابق گزشتہ روز لاہور کے زمان پارک میں پی ٹی آئی سندھ کے وفد کی چیئرمین عمران خان سے اہم ملاقات ہوئی، جس میں مرکزی سیکریٹری جنرل اسد عمر، سندھ کے صدر علی زیدی، جنرل سیکریٹری مبین جتوئی، حلیم عادل شیخ، خرم شیر زمان، بلال غفار، ارسلان تاج، شہزاد قریشی، سدرہ عمران، اکرم چیمہ، آفتاب صدیقی، اسلم خان، فہیم خان، آفتاب جہانگیر اور عالمگیر خان شریک تھے۔
اجلاس میں علی زیدی نے سندھ کی مجموعی سیاسی صورت حال سے چیئرمن پی ٹی آئی عمران خان کو آگاہ کیا، سندھ میں بلدیاتی الیکشن کے دوسرے مرحلے کے نتائج سمیت دیگر امور پر گفتگو کی گئی، عمران خان کی جانب سے آفتاب صدیقی کو کراچی کا نیا صدر مقرر کیا گیا۔
پی ٹی آئی کراچی کے صدر بلال غفار کو عہدے سے ہٹا دیا گیا
اجلاس میں عمران خان نے واضح کیا کہ بلال غفار مرکزی نائب صدر اور چیئرمین پی ٹی آئی عمران خان کی معاشی ٹیم کا حصہ ہوں گے، عمران خان کی جانب سے خرم شیر زمان کو پی ٹی آئی سینٹرل ایگزیکٹو کمیٹی کا ممبر نامزد کیا گیا۔
عمران خان نے کہا کہ بلدیاتی الیکشن میں شکست کی وجہ تنظیمی قیادت اور سابق ایم این ایز اور ایم پی ایز میں کورآڈنیشن نہ ہونا تھا، میں کراچی میں تنظیمی سیٹ اپ مضبوط چاہتا ہوں، عمران خان نے نئے کراچی صدر کو ٹاسک دیتے ہوئے کہا کہ الیکشن جیتنا ہے تو ڈور ٹو ڈور مہم چلانا ہوگی۔
عمران خان نے تمام رہنماؤں کو ہدایت کی کہ کراچی کے ضمنی الیکشن کی مہم تیز کریں، عوام میں جائیں، کارنر میٹنگز کریں۔ انھوں نے کہا کہ تمام جماعتیں مل کر سیٹ ایڈجسمنٹ کر سکتی ہیں اس لیے بہت محتاط رہیں، کراچی الیکشن سے پہلے اگر میں ٹھیک ہو گیا تو جلسہ کرنے آؤں گا ورنہ ویڈیو لنک سے خطاب کروں گا۔
ان کا کہنا تھا کہ کراچی میں ماضی میں بھی ساری جماعتوں نے پی ٹی آئی کا مقابلہ کیا پھر بھی شکست مقدر بنی۔
