کابل / پشاور: افغانستان میں طالبان کی واپسی اور اقتدار سنبھالنے کے بعد پشاور میں برقعوں کی مانگ میں اضافہ ہوگیا۔
اے آر وائی نیوز کی رپورٹ کے مطابق طالبان کی جانب سے افغانستان کے دارالحکومت کابل کا 14 اگست کو اقتدار سنبھالنے کے بعد سے دنیا بھر میں مختلف تبدیلیاں دیکھنے میں آرہی ہیں۔
ان میں سب سے بڑی تبدیلی خود افغانستان میں ہے، جہاں ہزاروں کی تعداد میں شہری اپنا وطن چھوڑ کر اچھی زندگی کی تلاش میں دیارِ غیر جانے کے خواہش مند ہیں۔
بیرونِ ملک جانے کے خواہش مند افغان شہریوں کے انخلا میں امریکا، برطانیہ، فرانس سمیت دیگر مدد فراہم کررہے ہیں، جہاں کابل انٹرنیشنل ایئرپورٹ موجود جہازوں کے ذریعے ان شہریوں کو منتقل کیا جارہا ہے۔
افغانستان میں طالبان کے اقتدار سنبھالنے اور اکثریت میں آنے کے بعد خیبرپختون خواہ کے دارالحکومت پشاور میں برقعوں کی مانگ میں اضافہ دیکھنے میں آرہا ہے۔
دکانداروں کے مطابق ’طالبان کے آنے کے بعد سے اُن کا کاروبار چمک اٹھا ہے کیونکہ بڑی تعداد میں برقعے اور حجاب افغانستان برآمد کیے جارہے ہیں‘۔
