اسلام آباد : ڈسٹرکٹ اینڈ سیشن کورٹ اسلام آباد کی عدالت نے سابق وفاقی وزیر اور پی ٹی آئی رہنما علی امین گنڈاپور کا دو روزہ راہداری ریمانڈ منظور کرلیا۔
علی امین گنڈاپور کا راہداری ریمانڈ لینے کے لیے بھکر پولیس اسلام آباد کچہری پہنچی جہاں ڈیوٹی مجسٹریٹ نوید خان کی عدالت میں علی امین گنڈا پور کو پیش کیا گیا۔
تفصیلات کے مطابق ڈسٹرکٹ اینڈ سیشن کورٹ اسلام آباد کی عدالت نے ڈیوٹی مجسٹریٹ نوید خان نے علی امین گنڈاپور کے خلاف 3مختلف مقدمات کا تفصیلی فیصلہ جاری کردیا۔
فیصلے کے مطابق علی امین گنڈا پور پر ناقابلِ ضمانت دفعات کے تحت تھانہ سرائے مہاجر بھکر میں پہلا مقدمہ درج ہے، سرائے مہاجر بھکر پولیس کی استدعا پر علی امین گنڈاپور کا ایک روزہ راہداری ریمانڈ منظور کیا جاتا ہے۔
اس کے علاوہ دہشتگردی ایکٹ کے تحت درج دوسرے مقدمے میں علی امین کا2روزہ راہداری ریمانڈ منظور کیا جاتا ہے۔ علی امین گنڈاپور کو 15اپریل کو متعلقہ اے ٹی سی میں پیش کیا جائے۔
تفصیلی فیصلے کے مطابق بھکر میں درج تیسرے مقدمے میں علی امین گنڈاپور کا ایک روزہ راہداری ریمانڈ منظور کیا جاتا ہے، علی امین کیخلاف تیسرا مقدمہ تھانہ سرائے مہاجر بھکر میں پنجاب اسلحہ آرڈیننس کے تحت درج ہے۔
