پیانگ یانگ : شمالی کوریا نے امریکی دھمکیاں کسی خاطر میں نہ لاتے ہوئے بیلسٹک میزائل کا کامیاب تجربہ کرلیا، شمالی کوریا کا کہنا ہے کہ وہ اپنے جوہری اور میزائل پروگرام کو جاری رکھے گا۔
اس حوالے سے جاپان نے کہا ہے کہ شمالی کوریا نے بدھ کے روز بیلسٹک میزائل کا تجربہ کیا ہے۔
ارنا کی رپورٹ کے مطابق شمالی کوریا نے امریکی دھمکیوں کو نظر انداز کرتے ہوئے بدھ کی صبح ایک بیلسٹک میزائل داغا جو بحیرہ جاپان میں گرا، نئے عیسوی سال میں شمالی کوریا کی جانب سے یہ پہلا بیلسٹک میزائل کا تجربہ ہے۔
واضح رہے کہ شمالی کوریا اقوام متحدہ کی پابندیوں، امریکہ سے معاہدے اور جنوبی کوریا سے ڈیل کو بالائے طاق رکھتے ہوئے اس سے قبل بھی ایٹمی صلاحیتوں کے حامل کروز میزائل اور بیلسٹک میزائل کے تجربات کرچکا ہے۔
ان تجربات پر امریکہ نے اپنا سخت رد عمل دکھاتے ہوئے شمالی کوریا پر مختلف اقسام کی پابندیوں کی دھمکی دی ہے۔
دوسری جانب شمالی کوریا کا واضح طور پر کہنا ہے کہ جب تک امریکہ پیانگ یانگ کے خلاف اپنی مخالفانہ پالیسی کو ترک نہیں کرتا اس وقت تک اپنے جوہری اور میزائل پروگرام کو جاری رکھے گا۔
مزید پڑھیں : شمالی کوریا کا آبدوز سے بیلسٹک میزائل کا کامیاب تجربہ
یاد رہے کہ گزشتہ سال ماہ اکتوبر میں شمالی کوریا نے ایٹمی صلاحیت کے حامل سپر سونک میزائل اور کروز میزائل کے تجربات کیے تھے تاہم اس بار بیلسٹک میزائل کے تجربے کیے گئے ہیں۔
