اسلام آباد: صدر مملکت عارف علوی نے وزیر اعظم شہباز شریف کو خط لکھ کر صحافیوں کو ہراساں کیے جانے کے واقعات پر اظہار تشویش کیا ہے۔
تفصیلات کے مطابق صدر پاکستان ڈاکٹر عارف علوی نے وزیرا عظم شہباز شریف کو ایک خط لکھا ہے، جس میں انھوں نے ملک میں صحافیوں پر مقدمات بنائے جانے اور تشدد کے واقعات پر اظہار تشویش کیا۔
انھوں نے خط میں لکھا کہ صحافیوں پر تشدد کے حالیہ واقعات عدم برداشت کی ذہنیت کے عکاس ہیں، اظہار رائے کی آزادی سب کو حاصل ہے، ایسے واقعات ملک میں خوف پھیلاتے ہیں، اور ملک کا تشخص بھی داغدار کرتے ہیں۔
عارف علوی نے مزید لکھا کہ صحافیوں کو ایک کیس میں ریلیف ملتا ہے تو ہراساں کرنے کے لیے ان کے خلاف دوسرا کیس بنا دیا جاتا ہے۔
صدر مملکت نے صورت حال پر تشویش ظاہر کرتے ہوئے کہا کہ ایسا لگتا ہے کہ آزاد رائے رکھنے والے میڈیا پرسنز کے خلاف دہشت کا راج چھا گیا ہے۔
سی پی این ای کا عمران ریاض کو فوری رہا کرنے کا مطالبہ
انھوں نے لکھا کہ قانون نافذ کرنے والے اداروں اور سیاست دانوں کو صحافیوں کے تحفظ کے لیے اپنا کردار ادا کرنا چاہیے۔
واضح رہے کہ صحافی عمران ریاض کے خلاف کئی شہروں میں متعدد بے بنیاد مقدمات درج کیے جا چکے ہیں، انھیں ایک جگہ کی عدالت سے ریلیف ملتا ہے تو فوراً دوسرے شہر کی پولیس انھیں حراست میں لے لیتی ہے۔
