لندن: پاکستانی اداکارہ ارمینا خان برطانیہ کے سابق وزیر خارجہ بورس جانسن پر برقع پوش خواتین کو لیٹر بکس سے تشبیہ دینے پر برس پڑیں۔
تفصیلات کے مطابق سماجی رابطے کی ویب سائٹ ٹویٹر ارمینا رانا خان نے بورس جانسن کو سناتے ہوئے کہا کہ اگر خواتین برقع پہننا چاہتی ہیں تو یہ ان کا حق ہے کیونکہ یہ خواتین کا بنیادی حق ہے کہ وہ جو پہننا چاہتی ہیں پہن سکتی ہیں۔
ارمینا نے کہا اگر خواتین مختصر کپڑے پہننا چاہیں تو وہ کپڑے منتخب کرنے میں آزاد ہیں، میں ایک بنیادی اصول کی حمایت کررہی ہیں۔
اداکارہ ارمینا خان لندن میں ہی رہائش پذیر ہیں انہوں نے اے آر وائی ڈیجیٹل کے ڈرامے ’رسم دنیا‘ میں بھی اداکاری کے جوہر دکھائے تھے۔
Yet another privileged middle-aged bloke telling women what they can and can’t wear. If a woman wants to wear a burqa it’s her right Mr. #BorisJohnson it is her RIGHT to choose which goes hand in hand with British values #therighttochoose
— Armeena Khan (@ArmeenaRK) August 8, 2018
واضح رہے کہ بورس جانسن کے اس بیان پر برطانیہ کی وزیر اعظم تھریسامے نے بھی ردعمل دیتے ہوئے کہا تھا کہ بورس جانسن نے غلط زبان استعمال کی انہیں اس طرح کے الفاظ استعمال نہیں کرنا چاہئے تھے۔
خیال رہے کہ چند روز قبل سابق برطانوی وزیر خارجہ بورس جانسن نے ڈنمارک میں برقعہ کے استعمال پر پابندی بیان میں کہا تھا کہ مسلم خواتین برقعہ میں لیٹر بکس کی طرح دکھائی دیتی ہیں جس پر انہیں شدید تنقید کا سامنا ہے۔
برطانیہ کی حکمران جماعت کنزرویٹو پارٹی کو بورس جانسن کے حوالے سے درجنوں شکایات موصول ہوچکی ہیں، جس میں بورس جانسن سے معافی اور ان کی برطرفی کا مطالبہ کیا گیا ہے۔