اسلام آباد : صحافی ارشد شریف کی والد نے وزیراعظم شہباز شریف سے بیٹے کی میت جلد پاکستان لانے کی درخواست کردی۔
تفصیلات کے مطابق وزیر اعظم شہباز شریف نے صحافی ارشد شریف کی والدہ سے ٹیلی فون پر تعزیت کا اظہار کرتے ہوئے کہا ارشد شریف کی وفات کی خبر پر بے حد رنج ہوا۔
ارشد شریف کی والدہ نے ارشد شریف کی میت جلد پاکستان لانے کی درخواست کی ، جس پروزیر اعظم نے یقین دہانی کرائی کہ میت لانے کے اقدامات ہنگامی بنیاد پر کئے جا رہے ہیں۔
والدہ ارشد شریف نے کہا کہ آپ میرے چھوٹے بیٹے کی وفات پربھی تعزیت کیلئے گھر آئے تھے۔
وزیراعظم شہبازشریف کا کہنا تھا کہ حکومت پاکستان کینیا کی حکومت سے مسلسل رابطے میں ہے، مرحوم ارشد شریف کی میت وطن واپسی کیلئے فوری اقدامات کی ہدایت کی ہے۔
وزیراعظم نے یقین دہانی کرائی کہ ضابطے کی کاروائی کرکےارشد شریف کی میت پاکستان لائیں گے۔
خیال رہے گذشتہ شپ اینکرپرسن ارشدشریف کینیا کے شہر نیروبی میں گولی لگنے سے شہید ہوگئے تھے۔
واقعہ نیروبی سے دو گھنٹے کے فاصلے پر واقع علاقے میں پیش آیا تاہم کینیا کی مقامی پولیس کی جانب سے واقعے کی تحقیقات جاری ہیں۔
