اسلام آباد: اسلام آباد ہائیکورٹ نے عورت مارچ سے متعلق دونوں درخواستیں خارج کردیں۔
تفصیلات کے مطابق اسلام آباد ہائیکورٹ نے عورت مارچ پر محفوظ فیصلہ سناتے ہوئے دونوں درخواستیں خارج کردیں، اسلام آباد ہائیکورٹ نے ریمارکس دئیے کہ عورت مارچ کے خلاف دونوں درخواستیں میرٹ پر نہیں ہیں۔
اسلام آباد ہائیکورٹ نے دو صفحات پر مشتمل تحریری فیصلہ جاری کردیا، حکم نامہ 2 درخواست گزاروں کو اوپن کورٹ میں سنایا گیا۔
حکم نامے کے مطابق پارلیمانی کمیٹی میں معاملے کو لے جایا جاسکتا ہے، اسلام آباد ہائیکورٹ کے اختیارات محدود ہیں، معاملے کو سپریم کورٹ میں بھی پیش کیا گیا ہے۔
مزید پڑھیں: عورت مارچ کےخلاف درخواست قابل سماعت ہونے پر فیصلہ محفوظ
واضح رہے کہ اس سے قبل چیف جسٹس کا کہنا تھا کہ سب سےپہلے جس نے اسلام قبول کیا وہ خاتون تھیں، خواتین نے کہا وہ اسلام میں دیےگئے اپنے حقوق مانگ رہی ہیں، پریس کانفرنس میں اپنی بات واضح کردی تو کیسے مختلف تشریح کرسکتے ہیں۔
جسٹس اطہرمن اللہ نے مزید کہا کہ آج پورے میڈیامیں ان کی کل کی پریس کانفرنس شائع ہوئی ہے اور استفسار کیا کس نے بچیوں کو زندہ دفن کرنے کی رام کوختم کرایاہے؟ جس پر وکیل درخواست گزار نے بتایا کہ حضرت محمدﷺ نے بچیوں کو زندہ دفن کرنا ختم کرایا تو چیف جسٹس نے کہا آج بھی ہمارے معاشرے میں بچیوں کے پیدا ہونے کو اچھا نہیں سمجھا جاتا۔
وکیل درخواست گزار نے کہا عدالت قانون کے مطابق مارچ پر پابندیاں عائدکرے، میں مارچ میں لگنے والے 3نعرےاس عدالت کے سامنے رکھتاہوں، جس پر چیف جسٹس نے کہا اگر8مارچ کو کچھ خلاف قانون ہوتاہے تو اس کے خلاف کارروائی ہوگی، درخواست گزار قبل ازوقت ریلیف مانگ رہےہیں۔
