اسلام آباد: احتساب عدالت میں ایون فیلڈ ریفرنس کی سماعت 19 جون تک ملتوی کردی گئی۔ مریم نواز کے وکیل امجد پرویز 19 جون کو حتمی دلائل دیں گے۔
تفصیلات کے مطابق احتساب عدالت میں شریف خاندان کے خلاف ایون فیلڈ ریفرنس پر سماعت احتساب عدالت کے جج محمد بشیر نے کی۔
سابق وزیر اعظم نواز شریف کی صاحبزادی مریم نواز کے وکیل امجد پرویز ایڈووکیٹ عدالت میں پیش نہ ہوئے۔ معاون وکیل محمد اورنگزیب نے بتایا کہ امجد پرویز کی طبیعت خراب ہے عدالت میں پیش نہیں ہوسکتے۔
نواز شریف کی جانب سے خواجہ حارث کی جگہ جہانگیر جدون نے وکالت نامہ داخل کروا دیا۔
خیال رہے کہ نواز شریف کے وکیل خواجہ حارث نے کیس سے عیلحدگی اختیار کرتے ہوئے کہا تھا کہ سپریم کورٹ نے نواز شریف کے خلاف تینوں نیب ریفرنسز کا ٹرائل 6 ہفتوں میں مکمل کرنے سے متعلق ان کے مؤقف کو تسلیم نہیں کیا اور ڈکٹیشن دی کہ ایک ماہ میں ریفرنسز کا فیصلہ کریں۔
ان کا کہنا تھا کہ ایسے حالات میں وہ کام جاری نہیں رکھ سکتے۔
امجد پرویز کی غیر حاضری پر نیب پراسیکیوٹر سیخ پا ہوگئے اور ان کے اور معاون وکیل کے درمیان گرما گرمی ہوگئی۔
پراسیکیوٹر نے کہا کہ ان کے وکلا کیس نہیں چلا سکتے تو ملزمان کو بلائیں وہ خود اپنا کیس لڑیں۔ اپنی مرضی کا وقت لے کر آج کہتے ہیں طبیعت خراب ہے۔
انہوں نے کہا کہ وکیل صفائی خود تاخیری حربے استعمال کرتے ہیں اور باہر جا کر شور کرتے ہیں کہ ٹرائل میں تاخیر ہو رہی ہے۔ ’یہ ڈرامے کر رہے ہیں‘۔
معاون وکیل نے کہا کہ یہ کس قسم کے الفاظ استعمال کیے جا رہے ہیں۔ ہمیشہ تعاون کیا، ایک دن طبیعت خراب ہوگئی تو کیا ہوا۔
پراسیکیوٹر نیب نے کہا کہ امجد پرویز نہیں ہیں تو جہانگیر جدون کو کہیں دلائل دیں جس پر جہانگیر جدون نے کہا کہ مجھے ابھی کلائنٹ سے ہدایات نہیں ملیں۔
جج نے کہا کہ آپ نے وکالت نامہ داخل کروا دیا اور آپ کو ہدایات نہیں ملیں جس پر جہانگیر جدون نے کہا کہ آج صرف استثنیٰ کی درخواست دی ہے، یہی ہدایات تھیں۔
معاون وکیل نے کہا کہ خواجہ حارث نے کیس میں 9 ماہ بڑی محنت کی۔ کسی دوسرے وکیل کے لیے کیس چلانا مشکل ہوگا۔
جج نے کہا کہ جہانگیر جدون پہلے دن سے آ رہے ہیں، کیس کو اچھی طرح سمجھتے ہیں۔
جہانگیر جدون نے بتایا کہ نواز شریف خواجہ حارث سے رابطے میں ہیں۔ انہیں راضی کرنے کی کوشش کی جا رہی ہے۔
عدالت نے امجد پرویز کو 19 جون کو حتمی دلائل کے لیے آخری موقع دے دیا۔ کیس کی مزید سماعت 19 جون تک ملتوی کردی گئی۔
خیال رہے کہ نواز شریف اور مریم نواز بھی آج عدالت میں پیش نہیں ہوئے۔ وہ آج صبح ہی کلثوم نواز کی عیادت کے لیے لندن روانہ ہوچکے ہیں۔
خبر کے بارے میں اپنی رائے کا اظہار کمنٹس میں کریں۔ مذکورہ معلومات کو زیادہ سے زیادہ لوگوں تک پہنچانے کے لیے سوشل میڈیا پر شیئر کریں۔
