میر پور : معاون خصوصی برائے اطلاعات و نشریات ڈاکٹر فردوس عاشق اعوان نے کہا میرپور میں ریڈیو پاکستان کا دفترکنٹینر میں شفٹ کیا جا رہا ہے، ریڈیوپاکستان مقبوضہ کشمیر میں قید بہن بھائیوں تک آواز پہنچاتا ہے۔
تفصیلات کے مطابق وزیراعظم کی معاون خصوصی برائے اطلاعات و نشریات ڈاکٹر فردوس عاشق اعوان نے میر پور آزاد کشمیر ریڈیو پاکستان کا دورہ کیا اور صورتحال کا جائزہ لیا۔
حالیہ زلزلے میں میرپور آزاد کشمیر ریڈیو کی عمارت کو بھی شدید نقصان پہنچا تھا اور ریڈیو میر پور نے کنٹینر میں اپنی نشریات جاری رکھیں ہوئی ہیں۔
فردوس عاشق اعوان نے میرپور میں کنٹینرمیں ریڈیو پاکستان کے قیام پر گفتگو کرتے ہوئے کہا میرپور میں ریڈیو پاکستان کا دفترکنٹینر میں شفٹ کیا جا رہا ہے، ریڈیو پاکستان سےہماری آواز سری نگر اور مقبوضہ کشمیر تک جاتی ہے۔
فردوس عاشق اعوان کا کہنا تھا کہ ریڈیوپاکستان مقبوضہ کشمیر میں قید بہن بھائیوں تک آواز پہنچاتا ہے، بھارت نےکشمیری بہن بھائیوں کی میڈیا تک رسائی بند کر رکھی ہے، کشمیری اپنے خون سے آزادی کی تاریخ لکھ رہے ہیں ہمیں ان پر فخر ہے۔
