آذربائیجان ایئر لائنز کے طیارے کو پیش آنے والے حادثے کے بعد کئی سوالات نے جنم لے لیا، زندہ بچنے والے ایک مسافر نے اہم انکشاف کردیا۔
غیر ملکی خبر رساں ایجنسی کی رپورٹ کے مطابق حادثے میں زندہ بچ جانے والے ایک مسافر نے انکشاف کیا ہے کہ طیارہ گرنے سے پہلے ایک زوردار دھماکہ ہوا تھا۔
مذکورہ مسافر سبحان کل رحیموف کا دعویٰ ہے کہ گروزنی ایئرپورٹ پر لینڈ کرنے کی درخواست کرنے کے بعد ایک زوردار دھماکے کی آواز سنائی دی تھی۔
مسافر نے روئٹرز کو بتایا کہ طیارہ اپنی ابتدائی منزل جنوبی روس کے شہر گروزنی کی جانب رواں دواں تھا کہ اچانک ایک زوردار دھماکہ سے گونج اٹھا۔
مسافر سبحان کل رحیموف نے اسپتال سے بات کرتے ہوئے روئٹرز کو بتایا۔ انہوں نے کہا کہ دھماکہ سننے کے بعد انہوں نے دعائیں پڑھنی شروع کر دیں مجھے لگا کہ طیارہ ٹوٹ کر بکھر جائے گا، اور زندگی کے خاتمے کے لیے خود کو تیار کرلیا۔
اس کے علاوہ حادثے کے شکار ہونے والے مسافر طیارے کے بارے میں یہ اطلاعات سامنے آ رہی ہیں کہ طیارہ مبینہ طور پر میزائل حملے کا نشانہ بنا ہے، روسی یا چیچن فورس کے چلائے گئے میزائل کے فضا میں پھٹنے کے باعث اس کے ٹکڑے مسافر طیارے کے پچھلے حصے پر لگے ہیں۔
دوسری جانب روس کا کہنا ہے کہ ہمیں حادثے کی مکمل تحقیقاتی رپورٹ کا انتظار ہے تاکہ حقیقت کا پتا چل سکے۔
آذربائیجان کی تحقیقات کے ابتدائی نتائج سے واقف چار ذرائع نے روئٹرز کو بتایا ہے کہ حادثہ روسی فضائی دفاعی نظام کی غلطی سے پیش آیا جو غلطی سے اس طیارے کو نشانہ بنا بیٹھا۔
واضح رہے کہ گزشتہ روز آذربائیجان سے روس کے لیے پرواز کرنے والا مسافر طیارہ قازقستان کے شہر اکتاؤ کے قریب گر کر تباہ ہو گیا تھا، جس میں 39 افراد ہلاک اور 28 زخمی ہو گئے تھے، بدقسمت طیارے میں عملے سمیت 67 افراد سوار تھے، طیارہ باکو سے گروزنی چیچنیا کی طرف محو پرواز تھا۔
