سائنسدانوں نے دریافت کیا ہے کہ بعض بیکٹیریا جو انسانوں میں بیماری کا باعث بنتے ہیں مریخ پر زندہ رہنے کی صلاحیت رکھتے ہیں۔
جرمن ایرو اسپیس سینٹر کی ایک نئی تحقیق کے مطابق انسانی جسم میں رہنے والے چند ایسے بیکٹیریا جو جسم پر زیادہ دباؤ پڑنے سے بیماریوں کا سبب بنتے ہیں، وہ مریخ پر نا صرف زندہ رہ سکتے ہیں بلکہ وہاں ان کی نشونما بھی ممکن ہے۔
یہ دریافت مستقبل کے مریخ مشن پر مائیکروبیل آلودگی کے امکانات اور انسانی نو آبادیات کے امکان کے بارے میں خدشات کو جنم دیتی ہے۔
مطالعہ سے پتہ چلتا ہے کہ یہ بیکٹیریا جنہیں موقع پرست پیتھوجینز کہا جاتا ہے، مریخ کے ماحول کے سخت حالات کا مقابلہ کرسکتے ہیں، بشمول کم درجہ حرارت اور تابکاری کی بلند سطح کے۔
سرخ سیارے پر محفوظ اور جراثیم سے پاک مشن کی منصوبہ بندی اور ان پر عمل درآمد کے لیے ان جرثوموں کی بقا کی صلاحیتوں کو سمجھنا بہت ضروری ہے۔
جرمن ایرو سپیس سینٹر کولون سے وابستہ سائنسدانوں کی اس ٹیم کی سربراہی توماسو زکاریا نے کی ہے۔ زکاریا نے ڈوئچے ویلے کو بتایا کہ مریخ کی سطح پر درجہ حرارت انتہائی کم ہے اور وہاں ایسے دیگر عوامل کی صورت حال بھی نامناسب ہے، جنہیں کسی سیارے پر انسانی زندگی کے لیے لازمی سمجھا جاتا ہے۔
وہ کہتے ہیں کہ اس کے باوجود سائنسدان نظام شمسی کے دیگر سیاروں کی نسبت مریخ پر ممکنہ طور پر انسانی آبادیاں میں زیادہ دلچسپی اس لیے رکھتے ہیں کہ ایک تو یہ سیارہ زمین سے نسبتا قریب ہے اور پھر مریخ کا ایک دن بھی زمین کے ایک دن کی طرح چوبیس گھنٹے کا ہوتا ہے۔
ابتدائی حوصلہ افزاء نتائج کے بعد زکاریا کی ٹیم نے ان بیکٹیریا کی کالونیوں کو مصنوعی طور پر تیار کردہ مریخ کی مٹی میں رکھا۔ وہ کہتے ہیں کہ ہمارا خیال تھا کہ بیکٹیریا پر زہریلے اثرات پڑنے سے وہ فورا ہی مر جائیں گی۔ مگر حیرت انگیز طور پر چار میں سے تین بیکٹیریل انواع زندہ رہیں اور 21 دن تک ان کی نشونما بھی نوٹ کی گئی۔
واضح رہے کہ سائنسدان ایک عرصے سے مریخ پر انسانوں کی آباد کاری کے لیے تحقیق میں مصروف ہیں۔ دنیا بھر کی اسپیس ایجنسیاں مریخ کی جانب اپنے مشنز روانہ کررہی ہیں تاکہ مستقبل کی منصوبہ بندی کے لیے مکمل ڈیٹا حاصل کیا جا سکے۔
اس ڈیٹا سے لیباٹریز میں تجربات کرکے یہ معلوم کرنے کی کوشش کی جارہی ہے کہ انسان مریخ کے شدید ماحول اور انتہائی کم درجۂ حرارت میں کس طرح زندہ رہ سکیں گے۔
