ریاض: سعودی پولیس نے کامیاب کارروائی کرتے ہوئے جعلی اقامے فروخت کرنے والے غیرملکی کو گرفتار کرلیا، ملزم بڑی مہارت سے جعلی دستاویزات تیار کرتا تھا۔
تفصیلات کے مطابق سعودی شہر مکہ مکرمہ میں پولیس کو یہ اہم کامیابی ملی، ملزم کا تعلق اتھوپیا سے ہے، گرفتار شخص نہ صرف جعلی اقامے تیار کرتا تھا بلکہ اسے میڈیکل انشورنس کارڈ، ڈرائیونگ لائسنس اور حج اجازت ناموں میں بھی جعلسازی کی مہارت حاصل تھی۔
عرب میڈیا کے مطابق پولیس حکام کا کہنا ہے کہ گرفتار شخص سے ڈھائی سو سے زائد جعلی اقامے برآمد ہوئے۔ جبکہ متعدد جعلی انشورنس کارڈ، سرکاری اداروں کی جعلی مہریں اور اقامہ کارڈ بنانے کے آلات بھی ضبط کیے گئے۔
یہ کارروائی خفیہ اطلاعات پر کی گئی۔
مکہ پولیس کے مطابق جعلی سازی سے متعلق مخصوص شعبے نے اتھوپین شخص کے خلاف پہلے سے ہی ریکی شروع کردی تھی۔ بعد ازاں تمام شواہد اکھٹا ہونے کی بنیاد پر چھاپہ مارا گیا اور ملزم کی گرفتار عمل میں آئی۔
